Tamara Seijas e Diego Álvarez anótanse as xerais da Transgalaica 2025

Sen pleno de vitorias nos cinco desafíos do seu calendario, a Transgalaica 2025 resolveuse este domingo en Manzaneda coa elite Tamara Seijas e o máster-30 Diego Álvarez encabezando as clasificacións xerais. Tanto a lalinense do RG Bikes Scott como o tudense do Podium Team venceron nos catro primeiros maratóns (Cerdedo-Cotobade, Ames, Silleda e Friol) e faltoulles adxudicarse o último para completar o repóker no circuíto de XCM coordinado pola empresa Team Relay. 

Os triunfos na estación de montaña ourensá acadáronos o elite Pablo Rodríguez (Buff Megamo) e a elite Mar Delgado (Monteneme). Nin o primeiro posto da xeral absoluta masculina nin o da feminina variaron. Diego Álvarez logrou a súa terceira coroa da Transgalaica por diante do elite Brandán Márquez (V Bikes) e co máster-40 Manuel Casuso (Xesteiras) na terceira praza. Pola súa parte, Tamara Seijas conquistou por primeira vez este circuíto de probas de Cross Country Maratón, ocupando a elite Raquel Román (Bici Verde) a segunda posición e a máster Rebeca Muñoz (Xesteiras), a terceira. Coas camisolas de líderes da Transgalaica do Futuro fixéronse Samuel Tomé (Toxo) e Noa Rodríguez (Creto Bikes). 

Clasificacións