A Xaxanbike repite este domingo como Campionato de Galicia Eliminator

Por segundo ano consecutivo a emerxente especialidade do Cross Country Eliminator (XCE) celebra o seu Campionato de Galicia na Xaxanbike. Os títulos autonómicos  poranse en xogo este domingo a partir das 09:30 horas no circuíto de Chan de Gagán co XSM exercendo de club anfitrión. Esta cita porá o broche a dous intensos días de BTT en Marín.

A Xaxanbike 22, que este sábado arranca en sesión matinal co Mini BTT e pola tarde vivirá a antepenúltima xornada da Copa Galicia de Cross Country Olímpico, foi presentado este venres en Marín. Ao acto asistiron a alcaldesa María Ramallo; os concelleiros encargados do Deporte, Antonio Traba e Antonio Caíña; o xefe de servizo da Secretaría Xeral para o Deporte na provincia de Pontevedra, Daniel Benavides; a presidenta do club organizador, Irene Trabazo, xunto a compoñentes do seu equipo; e o secretario da Federación Ciclismo Galego, David Carrillo. 

Os tres eventos da fin de semana disputaranse no mesmo escenario. O percorrido do Eliminator ten unha lonxitude de 721 metros, cun perfil duro e unha dificultade técnica alta. O formato da competición será o habitual cunha contra o reloxo individual para distribuír aos bikers no cadro de eliminatorias. En cada carreira haberá dous billetes en xogo para acceder á seguinte rolda ata alcanzar a final. No 2021 as camisolas de campións de Galicia recibíronas Sofía Álvarez e Jorge Punzón.