Seis ciclocrosistas de Galicia entran na convocatoria de España para o Campionato de Europa

Por segundo ano consecutivo Galicia conta con seis ciclocrosistas na convocatoria de España para o Campionato de Europa. A sub23 Laura Mira (Supermercados Froiz), o sub23 Miguel Rodríguez (Supermercados Froiz), o júnior Tomás Pombo (Padronés-Cortizo) e as juniors Uxía Soto (Supermercados Froiz), María Filgueiras (XSM) e Aroa Otero (Supermercados Froiz) defenderán as cores do combinado estatal esta fin de semana, días 5 e 6 de novembro, no circuíto belga de Namur. A nosa comunidade é a que conta con maior representación na lista de 17 ciclistas confeccionada polo seleccionador Pascual Momparler. 

O sábado a acción arrancará ás 11:00 horas coa proba junior feminina. Ás 13:15 h. disputarase a carreira sub23 masculina, pechando a xornada a cita para as mulleres elite. Xa o domingo os juniors homes abrirán a competición ás 11:00 h., coas mulleres sub23 concorrendo ás 13:15 h. e a carreira elite masculina botando o peche ao Campionato desde as 15:00 horas da tarde.

As probas sub23 e elite tanto masculinas como femininas poderán seguirse en directo a través de Eurosport Player.

Máis información