Dous mosqueteiros do Extol dominan no segundo desafío da Copa Galicia XCM

Dúas semanas despois de arrancar en Piñor, a Copa Galicia de Cross Country Maratón (XCM) volveu ter como escenario os montes da provincia de Ourense. O Club Ciclista Os Mosqueteiros celebrou a décima edición do seu evento para os fondistas do BTT, un desafío de 72,3 quilómetros dominado por dous bikers elite do mesmo equipo. Susana Alonso e Javier Busto, ambos do Extol MTB Team, fixéronse cos triunfos absolutos na liña de meta do Carballiño. 

Os 172 participantes na distancia longa, e os 93 no medio maratón, atopáronse cunha xornada de tempo cambiante. O vento e a chuvia aumentaron a dificultade nalgúns puntos do percorrido. Con Boborás e O Irixo como concellos de paso, en total acumulábanse 1.930 metros de desnivel positivo. Coto Molín, Fonte Moreiras e San Bartolomeu de Freixa eran as principais subidas que presentaba o perfil. 

En solitario, e cun tempo de 3 horas 24 minutos e 45 segundos, o lalinense Busto estreou a súa conta de vitorias na Copa Galicia XCM 2022. O capitán do Extol tivo como principal adversario a Diego Álvarez (Team Oiense), que rematou a 2:10 do vencedor e grazas ao seu segundo posto sitúase á fronte tanto da xeral absoluta como da elite.

A terceira posición no Carballiño correspondeu Daniel García (Xesteiras), novo líder máster-30, tras un axustado man a man co elite Manuel Piñeiro (MTC). Alejandro Trasbach (Xesteiras) pechou o top-5 da carreira gañando nos máster-40, categoría na que Delmiro Acevedo (Burgas Bike) toma o mando do ranking. 

Vestidos como líderes dos seus grupos de idade venceron o júnior Hugo Álvarez (Academia Postal-Maceda), o sub23 Diego Marnotes (Terras de Cea), o máster-50 Francisco Xavier López (MTC) e o máster-60 Pedro Luis Delgado (BTT Ultreia). 

Alonso repite

A estrutura do Extol asinou un 'dobrete' no domingo previo a exercer de club anfitrión no Campionato de España de Ultramaratón. Susana Alonso revalidou o triunfo acadado o ano pasado na proba dos Mosqueteiros e impúxose cun rexistro de 3:51:36 nos 68,6 km da proba feminina. A superioridade da elite mosense non admitiu ningún tipo de discusión e Ana María González Cuña (Mitto X-Sauce), líder do ranking absoluto da Copa e da categoría máster-40, empregou case 20' máis que a representante do conxunto dezao.

Desirée Fernández (Ribadumia), que concluíu terceira, conserva o seu primeiro posto na xeral elite, mentres que a máster-40 Rebeca Muñoz (Xesteiras) obtivo a cuarta praza e a líder máster-30 Silvia Blanco (Avelaíñas), a quinta. 

O calendario da Copa Galicia XCM abriu no Carballiño unha paréntese e o circuíto de maratóns coordinado pola FCG regresará o 21 de agosto en Carral.

Clasificacións

Sección da Copa Galicia XCM