Brandán Márquez imponse no último desafío da Copa de España de Ultramaratón

Recén chegado de Guatemala, onde afrontou un reto solidario da man de Social Ciclismo Fan Manager, Brandán Márquez despediu a Copa de España de Ultramaratón (XCUM) 2022 dende o máis alto do podio. O vigués do VBikes impúxose este sábado no XII BTT Masadas de Ejulve, na provincia de Teruel, e coa súa primeira vitoria da temporada no certame estatal ratificou o seu segundo posto na xeral. Outro triunfo galego asinouno o gañador do ranking máster-50 Juan Manuel Expósito (MTC Team) e Jorge Abeal (3AG) acadou a terceira praza nos máster-40. 

O cuarto e último desafío da Copa XCUM comezou ás 7:00 horas da mañá, o que obrigou aos participantes a portar luces frontais nas súas bicicletas porque aínda era noite pechada, e propuxo un percorrido durísimo, composto por 160 quilómetros e 4.500 metros de desnivel. A esixencia do trazado seleccionou de forma natural os grupos cabeceiros ata deixar unicamente á fronte a aqueles corredores con fortaleza suficiente para pelexar o triunfo. Na competición masculina, Brandán Márquez, o líder Raúl Castrillo (Velobur) e Álvaro Nieto distanciáronse do resto de bikers. 

Os tres primeiros da xeral elite mantivéronse xuntos ata os metros finais e Márquez, cun tempo de 9:49:15, conseguiu cruzar a liña de meta por diante do castelán-leonés Raúl Castrillo, que deste xeito certificou a súa vitoria na xeral, e o terceiro posto ocupouno o tamén castelán-leonés Nieto. A case 38 minutos dos primeiros entrou Alberto Alanís (Burgas Bike), sétimo na táboa absoluta e quinto entre os elites. 

Deste xeito, a Copa XCUM 2022 resolveuse con Castrillo como gañador con 730 puntos, Márquez sumou 670, Nieto completou o podio con 605 e Alanís clasificouse cuarto con 436. 

Masters

Entre os 22 fondistas que alcanzaron a meta de Ejulve houbo dous galegos máis. Juan Manuel Expósito tiña no peto o ranking máster-50 e rubricou o título co seu segundo triunfo parcial desta campaña no certame estatal. O corredor do MTC Team obtivo a 12ª praza absoluta na proba turolense e xusto por riba del, undécimo, finalizou o máster-40 Jorge Abeal, terceiro no seu grupo idade, mesma posición ata a que ascendeu na xeral.  

Máis información e clasificacións

Páxina web da Copa