Jonas Vingegaard volve sorrir en O Gran Camiño

Volveuno facer, e, unha vez máis, arrincou palmarés en Galicia. O danés Jonas Vingegaard (Visma) reinou este venres no Camiño de Lugo tras impoñerse na primeira etapa en liña da terceira edición de O Gran Camiño.

Tras un gran traballo do seu equipo durante toda a xornada, o gañador das dúas últimas edicións do Tour de Francia arrincou como só el sabe e soltou aos seus rivais no alto de San Pedro de Líncora, chegando en solitario á meta de Chantada. Egan Bernal (Ineos Greanadiers) e Jefferson Cepeda (Caja Rural) foron segundo e terceiro, respectivamente, e realizaron un gran papel na xornada.

A primeira etapa en liña de O Gran Camiño 2024, a segunda da edición, uniu as localidades de Taboada e Chantada, cun percorrido de 151,2 quilómetros. Comezou a xornada de ciclismo con moita velocidade e varios intentos de fuga, entre os que se atopaba o dorsal 1, Jonas Vingegaard.

O pelotón pasou polo primeiro Sprint Bonificable compacto e Rubén Guerreiro (Movistar Team) impúxose ao resto de corredores en Palas de Rei. No quilómetro 30 de etapa saltaron 11 corredores que conformaron a fuga do día: Jorge Arcas (Movistar Team), Sebastian Berwick (Caja Rural), Diego Uriarte (Kern Pharma), Jose Manuel Díaz (Burgos - BH), Enekoitz Azparren (Euskaltel-Eskadi), Xabier Azparren (Q36.5 Pro Cycling Team), Davide Bais (Polti Kometa), Andrea Pietrobon (Polti Kometa), Alex Molenaar (Illes Balears Arabay Cycling), Tiago Antunes (Efapel Cycling) e Frederico Figueiredo (Sabgal Anicolor). Posteriormente, uniuse a este grupo o noruegués Embret Svestad-Bårdseng (Arkea-B&B Hotels).

Este grupo chegou a ter un máximo de 3 minutos de vantaxe, o que lle permitiu a Jose Manuel Díaz pasar en primeiro lugar no alto de Paradela, de terceira categoría.

O transcurso da etapa cambiou cando o equipo Visma púxose a traballar no pelotón, e as diferenzas reducíronse. A pesar disto, de novo, Jose Manuel Díaz pasou en primeiro lugar no alto de Sonán, de terceira categoría. A etapa volveu pasar por Taboada, onde houbo un Sprint Bonificable no que o máis rápido foi Xabier Azparren. Precisamente, o corredor vasco que tamén foi protagonista na primeira etapa, saltou do grupo de cabeza e rodou en solitario, o que lle permitiu coroar en primeiro lugar o primeiro paso polo Alto de San Pedro de Líncora, de segunda categoría.

En carreira reducíronse aínda máis as diferenzas, e Alex Molenaar, xunto co corredor máis combativo da xornada, Xabier Azparren, foron cabeza de carreira ata que quedaban seis quilómetros para o final. Aí saltou Jonas Vingegaard que, xunto a Egan Bernal e Jefferson Cepeda, foron os máis fortes da xornada.

A un quilómetro para o premio de montaña, o danés rompeu a carreira. Primeiro soltou a Jefferson Cepeda e, posteriormente, fixo o mesmo co colombiano do equipo Ineos Greanadiers. Vingegaard coroou en primeira posición o último paso polo Alto de San Pedro de Líncora e, posteriormente, entrou en solitario na liña de meta instalada en Chantada, converténdose en gañador da etapa e nova camisola amarela. Egan Bernal entrou en segunda posición e queda así a 28” de Jonas Vingegaard, mentres que Jefferson Cepeda, é terceiro a 30”. O primeiro corredor español, Raúl García Perna (Arkea-B&B Hotels), é oitavo a 55” do danés, e Carlos Canal (Movistar), primeiro galego, a 1’40”.

Por último, o equipo Groupama FDJ subiu ao podio como mellor equipo, Xabier Azparren, como líder da clasificación de puntos e Cian Uijtdebroeks (Visma), mellor corredor sub-23.

A terceira etapa unirá o sábado as localidades de Xinzo de Limia e Ribadavia, cun percorrido 173,2 quilómetros, e un final espectacular no Castelo de Ribadavia.

Clasificacións

Fonte: O Gran Camiño