Diego Calvo recibe un maillot asinado polo vencedor da Volta Ciclista a Galicia

O conselleiro de Presidencia, Xustiza e Deportes, Diego Calvo, recibiu este martes de mans do último vencedor da XXII Volta Ciclista a Galicia, José Luis Faura, un maillot amarelo asinado. Precisamente o pasado domingo Diego Calvo foi o encargado de facer entrega do trofeo ao corredor do equipo Padronés Cortizo na última etapa da proba en Sanxenxo. Na recepción de hoxe tamén estiveron presentes o secretario xeral para o Deporte, José Ramón Lete Lasa; o director do equipo Cortizo, Marcos Serrano; o director da Volta Ciclista a Galicia, Jacobo Ucha e o presidente da Federación Ciclismo Galego, Juan Carlos Muñiz. A competición, consolidada no calendario estatal na categoría elite e sub-23, reuniu a semana pasada a 17 equipos nun percorrido de case 455 quilómetros en catro etapas polas provincias de Lugo, Ourense e Pontevedra. 

Fonte: Xunta de Galicia