Alejandra Neira acada en Beasain o seu primeiro podio júnior na Copa de España

Antes de chegar a Galicia a vindeira fin de semana cunha dobre cita na nosa comunidade, o sábado en Betanzos e o domingo en Pontevedra, a Copa de España Féminas Cofidis celebrou a súa segunda xornada en Beasain. Nesta localidade guipuscoana a santiaguesa Alejandra Neira (Baqué Movistar Team) deu outro paso adiante na súa carreira ao asinar o seu primeiro podio júnior no certame estatal. Fixo segunda no desenlace do V Gran Premio Igartza e ascendeu ao segundo posto da xeral. 

A primeira das dúas ascensións ao alto de Lierni deixou en cabeza un sexteto ao que posteriormente se uniría unha sétima ciclista, a vasca Maier Olano (Zu-K). O percorrido de 48 quilómetros ofrecía unha segunda subida a Lierni, na que se descolgou a valenciana Leyre Almena (Río Miera). As seis corredoras máis fortes da xornada xogaríanse a vitoria ao esprint nas rúas de Beasain, impoñendo Irati Aranguren (Andoaingo) a súa punta de velocidade por diante de Alejandra Neira e a terceira praza ocupouna a castelaleonesa Lidia Castro (Mirat Team).

A gañadora situouse como nova líder na xeral con 10 puntos de vantaxe sobre a compostelá. Outra galega, Inés Santalla (Cambre), obtivo a décimo quinta praza. 

Por outra banda, na Copa de España Elite e Sub-23 masculina Martín Rey (Padronés Cortizo) regresou ao top-10 na cuarta clásica puntuable. O arousán apuntouse o noveno posto no Gran Premio Primavera de Ontur, carreira de 183 km disputada na provincia de Albacete. Terceiro quince días antes na Aiztondo Klasika, nesta ocasión o ciclista dirixido por Marcos Serrano concluíu nun grupo composto por unha vintena de unidades que cruzou a liña de meta a 39 segundos do murciano Sergio Geerling (Caja Rural-Alea), vencedor do man a man co colombiano Samuel Flórez (Padronés Cortizo). 

Malia os 40 puntos que sumou, Martín Rey caeu un posto na xeral e agora é sétimo. A seguinte proba deste certame chegará o 6 de abril no municipio xienense de Torredonjimeno. 

Máis información Copa feminina

Máis información Copa masculina