Alina Abramenka triunfa no Gran Premio Cidade de Pontevedra da Copa de España Féminas Cofidis

Tras a celebración no día de onte da Comarca Brigantina en Betanzos, Pontevedra recolleu a testemuña da dobre cita galega da Copa de España Féminas Cofidis este domingo.

Baixo un sol de xustiza, ao redor de 400 corredoras percorreron as estradas pontevedresas a beiras da ría, onde venceu a carreira elite e sub-23 unha ciclista do equipo galego Kiwi Atlántico, a bielorrusa Alina Abramenka, e a vasca Eukene Larrarte (Massi) mantense como líder da competición raíña.

Na máxima categoría, as ciclistas tiveron que percorrer 99 quilómetros, con dúas ascensións ao xa clásico Alto da Porteliña. No pelotón non houbo demasiado movemento ata falta de 30 quilómetros cando a primeira ascensión á Porteliña desmenuzaba o grupo e quedaban na cabeza unhas 20 corredoras con outras 20 seguíndoas moi de preto. Tras iso, a falta de 15 quilómetros, saltaban sete corredoras do pelotón: Nahia Imaz, Ingrid Ruiz, Wanda Florencia Villanueva, Salem Gerefiel, Alina Abramenka, Katherine Sheridan e Agua Marina Espínola, representante do conxunto local Team Farto-Kiroot. As sete emprenderon a última ascensión á Porteliña, pero Ingrid Ruiz (UPV) perdeu metros, polo que se conformaba un sexteto que se ía a disputar a vitoria ante o empuxe por detrás do pelotón. Nun esprint moi apertado a bielorrusa Abramenka impoñíase, por diante de Wanda Florencia Villanueva (Río Miera) e da sub23 Nahia Imaz (Massi). O grupo chegaba a meta a 16 segundos encabezado por Valeria Valgonen, mellor sub23 da competición estatal, mentres Eukene Larrarte entraba en 16ª posición, mantendo o liderado desta Copa de España.

A categoría júnior volveu vivir un fantástico espectáculo con corredoras que están chamadas a ofrecer unha gran substitución xeracional. Nunha proba marcada a 65 quilómetros e unha ascensión ao Alto da Porteliña, a carreira íase decidir nos intres finais. Un trío formado por Irene Reina, Julieth Amezquite e Irati Michelena atacou a falta de 20 quilómetros para a meta, chegando a coller unha renda dun minuto sobre o pelotón. Con todo, as favoritas empezaron a moverse por detrás e o terceto foi neutralizado en plena ascensión, e isto deixou na cabeza a Irene Moreno, Lidia Castro, Irati Aranguren, Leyre Almena, Celia Torres, Maier Olano, Ane Zubeldia e a santiaguesa Alejandra Neira. As oito corredoras ían disputar o esprint a pesar do intento da galega do Baqué Movistar cun ataque a escasos quilómetros da chegada. Esta vez, a vasca Irati Aranguren (Andoaingo) gañáballe a partida e o liderado a Leyre Almena (Río Miera), quen entrou en segunda posición. A terceira foi a do Ane Zubeldia (JGR). Sexta, repetindo o posto da véspera en Betanzos, Alejandra Neira volveu asinar o mellor resultado das ciclistas da nosa comunidade. 

Na categoría cadete, as tres primeiras corredoras en Betanzos foron as que se ían a disputar a proba de Pontevedra. A líder Maixa Odriozola, Lluna Jiménez, Carla Bañuls e Ana Lospitao marcháronse antes da última ascensión, onde a estremeña do Electromercantil desapareceu da ecuación, deixando o esprint de meta entre tres corredoras. A vasca Odriozola (Zu-K) foi a máis rápida, por diante de Jiménez e Bañuls, ampliando así a súa renda na clasificación xeral.

Nas máster 30, a vitoria foi para a líder Tamara Álvarez (Pafgio), seguida de Naomi Abrante. Nas master-40, Úrsula Ospina (Palafolls) volvía repetir, por diante de Berezi Martínez e Raquel Santos. Pola súa banda, nas máster-50, novamente María del Carmen Melgar (Villaverde Bajo) conseguía o triunfo, escoltada no podio por Inmaculada Valle e Cristina Bombardo.

A Copa de España Féminas Cofidis 2025 fará un parón ata o próximo 7 de xuño, cando se disputará o VII Trofeo Feminino Ayuntamiento de Estella en Navarra. 

Clasificacións

Fonte: RFEC