Presentación do Club Ciclista Teis

Este domingo tivo lugar o acto oficial de presentación do Club Ciclista Teis para a temporada 2025, celebrado na sede do seu patrocinador principal, Hermasa. A xornada reuniu a destacadas figuras do ámbito deportivo e institucional, reflectindo o apoio ao ciclismo e á traxectoria do club.

O evento contou coa presenza do alcalde de Vigo, Abel Caballero, xunto co concelleiro de Cultura, Gorka Gómez, quen resaltou a importancia do deporte na comunidade e o papel fundamental do Club Ciclista Teis na promoción do ciclismo. A xerente de Hermasa, Sara Rodríguez, reiterou o compromiso da empresa co club e co desenvolvemento do deporte local.

Por parte do ámbito ciclista, asistiron Enrique Vaz, presidente do Club Ciclista Teis, así como Juan Carlos Muñiz Nieto, presidente da Federación Ciclismo Galego, acompañado polo vicepresidente da entidade, Óscar Sánchez.

Durante o acto, levouse a cabo un recoñecemento especial ao anterior presidente do Club Ciclista Teis, Antonio Besteiro, en agradecemento polo seu excepcional labor e compromiso co club. A súa dedicación foi clave no crecemento e consolidación da entidade, deixando unha pegada indeleble no ciclismo galego.

 O Club Ciclista Teis conta cunha gran escola de base, formada por máis de 70 ciclistas con licenza, o que o converte nunha referencia na formación e desenvolvemento de novos talentos en Galicia. O seu compromiso co ciclismo de base é un piar fundamental da súa identidade, fomentando valores como o esforzo, a disciplina e o compañeirismo.

O alcalde de Vigo, Abel Caballero, destacou o gran traballo que o club realiza na formación de mozos ciclistas e o seu papel chave no desenvolvemento do deporte basee. Así mesmo, subliñou o apoio do Concello de Vigo ao club, reafirmando o seu compromiso co fomento do ciclismo e a actividade deportiva na cidade.

Pola súa banda, o presidente da Federación Ciclismo Galego, Juan Carlos Muñiz Nieto, recoñeceu o excelente labor de Antonio Besteiro durante a súa etapa á fronte do Club Ciclista Teis, resaltando a súa contribución ao crecemento do club e ao desenvolvemento do ciclismo galego. Ademais, destacou a importancia de seguir fomentando o deporte basee e expresou un agradecemento especial a toda a gran familia que forma o Club Ciclista Teis, pola súa dedicación e esforzo en favor da disciplina.

Con esta presentación, o Club Ciclista Teis reafirma o seu compromiso co ciclismo e coa formación de novos talentos, afrontando a tempada 2025 con entusiasmo e novos retos deportivos.