A Xunta activará este verán un visor dixital con máis de 50 rutas cartografadas e descargables

A Xunta de Galicia activará a mediados deste verán un novo visor dixital con máis de medio cento de rutas ciclistas por toda a Comunidade, perfectamente cartografadas e en formato descargable para facilitar a súa consulta desde diferentes dispositivos electrónicos.

Así o anunciou esta mañá en Sober a conselleira de Medio Ambiente, Territorio e Vivenda, Ángeles Vázquez, que coincidindo coa celebración do Día mundial da bicicleta participou na presentación da aplicación e realizou un percorrido en bici pola zona, acompañada polo delegado da Xunta en Lugo, Javier Arias, polo alcalde, Luis Fernández, e polo director do Instituto de Estudos do Territorio (IET), Enrique de Salvador.

O paseo discorreu ao longo dun pequeno tramo polos miradoiros do Boqueiriño e da Cividade, na contorna da igrexa de Santa María de Bolmente, que forma parte, precisamente, dun dos itinerarios ciclistas que se incorporarán nunha primeira fase ao visor A paisaxe de Galicia desde a bicicleta.

Tras lembrar que estes días o seu departamento organiza a Semana por unha Galicia sostible con motivo do Día mundial do medio ambiente, que se conmemora cada 5 de xuño, a conselleira celebrou o auxe que ten experimentado o ciclismo nos últimos anos, xa que se trata dunha das modalidades de transporte máis sostibles e que menos impacto ten sobre o medio ambiente, permitindo gozar da natureza sen alterala.

Todas as rutas están a ser compiladas pola Xunta nunha aplicación web a modo de visor coa colaboración da Federación Ciclismo Galego e da empresa do sector turístico Sherpa Project.

Estas fichas incluirán unha ampla información do itinerario como fotos, mapas, nivel de dificultade —familiar, media e experto—, perfís do terreo e, de maneira moi singular, a situación dos miradoiros e lugares cun alto valor paisaxístico.

Tamén incorporarán un código QR que redirixirá ao usuario a Wikiloc, unha aplicación gratuíta e moi estendida entre os ciclistas en todo o mundo, e a plataforma estará preparada para que se poida descargar e gardar o percorrido de cada ruta en diferentes dispositivos electrónicos, como GPS, reloxos intelixentes e móbiles.