O Enduro abre a temporada das Xornadas de Tecnificación FCG

Por quinto ano consecutivo a Federación Ciclismo Galego (FCG) pon en marcha a súa iniciativa de Xornadas de Tecnificación. A primeira actividade do 2025 terá como escenario este sábado a localidade coruñesa de Oleiros, nas inmediacións do Valiño, e estará dedicada ao Enduro. Unha vintena de promesas desta especialidade do BTT compartirán sesións prácticas e teóricas desde as 10:00 horas. 

A seleccionadora Eva Castro e a súa man dereita no corpo técnico Luis Manovel deseñaron un plan de traballo que, logo da benvida e da preparación das corredoras e dos corredores, arrancará con tests físicos e a primeira charla do día. A continuación, as primeiras repeticións de seccións serán gravadas para visualizar as imaxes , despois do xantar en grupo, e establecer un feedback. O programa da xornada prolongarase ata as 18:00 h con máis traballo enriba da bicicleta en dous circuítos diferentes. 

Esta toma de contacto pretende avaliar individualmente o estado dos riders, así como pulir detalles técnicos e ofrecer axuda á hora de deseñar o planning de adestramentos da temporada. Outro dos obxectivos destas convivencias é o de estreitar lazos para crear grupo no inicio do camiño que conduce ata o Campionato de España. Os técnicos da Selección de Galicia teñen previsto organizar durante os próximos meses dúas tecnificacións para cada unha das tres especialidades gravity (Enduro, Descenso e Pump Track).