Os catro gañadores do Gran Premio Ribeira Sacra adxudícanse as xerais finais da Copa Galicia Máster

O máster-30 Javier Freire logrou a vitoria absoluta en Monforte. Triunfos parciais nas súas categorías e nos rankings do certame autonómico para o máster-40 Francisco Javier Iglesias, o máster-50 José María Tajes e o máster-60 Manuel Prieto.

A espectacular chegada ao castelo de San Vicente en Monforte puxo o punto final á Copa Galicia Máster na temporada do seu regreso ás estradas. O máster-30 Javier Freire cruzou a liña de meta en primeira posición e tanto o corredor do Huerces como os gañadores das outras tres categorías no Gran Premio Máster Ribeira Sacra adxudícaronse as clasificacións xerais do certame autonómico. A terceira e última proba do calendario, ademais de definitiva, resultou decisiva. 

A quinta edición da carreira organizada polo Club Ciclista Chantadino inicio o seu percorrido de 80 quilómetros no mesmo punto onde 1 hora 37 minutos 15 minutos despois o líder máster-30 ergueu o seu brazo dereito como vencedor absoluto da xornada. O ciclista galego da formación asturiana Huerces superou ao esprint ao tamén máster-30 Iago Alonso (Chantadino).

A loita pola terceira praza e a vitoria máster-40 resolveuse 3" máis tarde de xeito moi axustado con Francisco Javier Mosquera (Cidade de Santiago) batendo a Jose Ignacio Méndez (Garaje Paco). Este resultado permitiu ao corredor do conxunto compostelano subir dous postos no ranking da Copa Galicia e facerse coa xeral. Quinto en Monforte concluíu o máster-40 Diego Álvarez (MTC Team).

A primeira posición máster-50 non a deixou escapar José María Tajes (Norinver), mentres que Manuel Prieto, outro corredor da mesma formación e que tamén vestía de líder do seu grupo idade, apuntouse o triunfo nos máster-60. 

En canto aos premios da carreira, Jose Ignacio Méndez levouse as Metas Volantes, Andrés Calvete (Monte Xalo) os Sprints Especiais, Iago Alonso a Montaña e a Combinada, Sergio Carreira (Noela) foi elixido corredor máis combativo da xornada e o Huerces dominou por equipos. 

O alcalde de Monforte e presidente da Deputación de Lugo, José Tomé Roca; o alcalde de Sober, Luis Fernández Guitián; e Óscar Sánchez, directivo da Federación Ciclismo Galego, encargáronse de coroar no podio aos triunfadores. Unha vez completada a Copa Galicia, que comezou en Oroso e celebrou a súa segunda cita en Noia, o pelotón máster autonómico reunirase o sábado na Estrada para disputar o Campionato de Galicia. 

Clasificacións G.P. Ribeira Sacra 

Sección da Copa Galicia Máster

GALERÍA DE FOTOS