Marín acolle a segunda proba da Copa de España de Ciclocrós 2025

A Copa de España de Ciclocrós 2025 volve este domingo á acción coa disputa da súa segunda proba puntuable, o Ciclocrós Internacional XaxanCX 2025 que se celebra na localidade pontevedresa de Marín.

O XSM Clube Ciclista organiza esta proba da clase C2 que se disputará en Chan de Gagán, Marín. O circuíto marinense, de 2600 metros de lonxitude, poñerá a proba aos participantes ofrecendo todo tipo de obstáculos e zonas técnicas: escaleiras artificiais, banco de area, dubis…

O domingo disputaranse todas as carreiras, coa competición arrancando ás 10:00 horas coas probas para cadetes. Ás 11:00 h. celebrarase a carreira júnior masculina, coa feminina dando comezo ás 12:30 h. A proba elite-sub23 feminina iníciase ás 13:30 h., mentres que a elite-sub23 masculina arrinca ás 14:45 h. Xa en horario de tarde disputaranse as probas máster.

Este evento, no que competirán ao redor de 350 participantes, contará coa presenza de Lucía González, gañadora da primeira cita en Gijón, a campioa estatal Sofía Rodríguez, e outras destacadas ciclistas como Alicia González ou Sara Cueto.

En canto aos homes, non estará o vixente gañador do certame e líder da Copa, Kevin Suárez, que compite esta fin de semana no Mundial de Gravel, pero si concorrerán na cita outros grandes nomes do panorama estatal como Mario Junquera, Gonzalo Inguanzo, Raúl Mira, Ismael Esteban, o ponteareán Miguel Rodríguez ou Unax Galán.

No acto de presentación participou o Concello de Marín, cos concelleiros Antonio Traba e Antonio Caíña; a Comunidade de Montes de Santomé; o club organizador, con ciclistas da súa escola e as corredoras elite e sub-23 Irene Trabazo e María Filgueiras; e a Federación Ciclismo Galego, co seu presidente Juan Carlos Muñiz e o técnico Alberto del Río. 

Máis información