O Cross Country Maratón galego busca reis e raíñas da temporada 2023 en Piñor

As últimas coroas autonómicas de BTT correspondente ao 2023 repártense este domingo na provincia de Ourense. Dende as 09:30 horas, e co concello de Piñor como punto de saída e chega, o XCM Audi Selection Plus exercerá na súa terceira edición de Campionato de Galicia de Cross Country Maratón. O desafío organizado polo Club Ciclista Ourense Termal propón un percorrido de 72 quilómetros e 2.100 metros de desnivel positivo acumulado para as categorías masculinas, agás a máster-60 que do mesmo xeito que as competidoras femininas afrontarán un itinerario de 59 km e 1.600 metros de desnivel. 

Ao redor de 130 participantes apuntáronse á cita que baixa o pano do calendario competitivo de XCM por esta temporada. A nómina de campións de Galicia actualizarase despois de que no 2022 se fixeran coas medallas de ouro en Cuntis o júnior Miguel Panadeiros, o sub23 Anxo Carril, Lara Lois e Rubén Deaño en Elite, Diana Blanco e Daniel García en Máster-30, Ana María González e Alejandro Trasbach en Máster-40, Francisco Xavier López en Máster-50 e Pedro Luis Delgado en Máster-60.

O pelotón de bikers arrancará dende o Campo da Peregrina e o trazado que lles agarda resulta esixente. A ruta mestura zonas rápidas e lentas por sendas e camiños, cruzando bosques como, por exemplo, a parte que transita polo Camiño de Santiago. As corredoras e os máster-60 non terán que subir A Madelena na segunda volta e no km 56 collerán o desvío que conduce á liña de meta. 

A oferta desta cita complétase coa primeira edición da Ruta da Prata, unha marcha cicloturista de 38 km e 950 metros de desnivel. Nesta actividade non competitiva permítese a participación das e-bikes. Comezará minutos despois de que se dé a saída á Audi Selection Plus - Concello de Piñor.

A presentación deste dobre evento tivo lugar no concesionario Apersa de Ourense coa presenza de Martín Manso, xefe de ventas; Daniel Rodríguez, presidente do Ourense Termal; José Luis González, alcalde de Piñor; Manuel Pérez, Xefe de Servizo na provincia de Ourense da Secretaría Xeral para o Deporte da Xunta de Galicia; Juan Carlos Muñiz, presidente da Federación Ciclismo Galego (FCG); Eduardo Alberca, delegado da FCG na provincia de Ourense; e Jose Carlos Sanmiguel, corredor do Ourense Termal. 

Toda a información sobre o Campionato de Galicia XCM podes atopala na súa sección dentro desta mesma páxina web e nas redes sociais a través do cancelo #CampionatoXCM23. 

Máis información