06 DE MAYO DE 2024
Fotos: Luz Iglesias
Dende o ano da paréntese por mor da pandemia, Ribadumia converteuse nunha cita ineludbile do Cross Country Olímpico galego. Catro temporadas e mesmo número de edicións do XCO Kiwi Atlántico, a proba que este domingo exerceu de cuarta xornada puntuable da Copa Galicia. Baixo a chuvia, o elite Saúl López (Academia Postal - Maceda) estivo intratable e dúas categorías cambiaron de líder.
O circuíto ao redor da planta da empresa Kiwi Atlántico presentou unhas condicións ideais para que os 260 inscritos desfrutaran da especialidade olímpica do BTT. Nin a auga caída estragou o excelente traballo realizado polo Club Ciclista Ribadumia. Un percorrido selectivo e no que case todos os gañadores da xornada estableceron diferenzas importantes.
Na súa segunda presenza desta temporada na Copa Galicia XCO, o monfortino Saúl López volveu cumprir co cartel de favorito. Gañador en Ribadumia no 2022, nesta ocasión completou a primeira das cinco voltas xunto ao líder elite Rubén Deaño (Ourense Termal), a quen descolgou no segundo parcial. O corredor do Academia Postal - Maceda impúxose con case 3 minutos de vantaxe. A terceira praza elite e absoluta da carreira raíña masculina defendeuna Alberto Pedreira (Bici Verde) con solidez ante a ameaza de Luis Fernández Oliveira (Avanza - O Porriño.
Na quenda de honra rexistráronse dous triunfos de líderes. Martín Sestelo (Avanza - O Porriño) dominou nos sub-23 e Adrián Caamaño (Caimanes Betanzos) encabezou a tripla do seu equipo nos juniors. En canto ás categorías femininas, a júnior Aroa Otero (Supermercados Froiz) marcou os mellores tempos e ao máis alto do podio tamén subiron Lara Pita (Cambre) nas cadetes, Sarela Conde (Academia Postal - Maceda) nas sub-23, Juana Vidal (Moto Bike) nas elites e Silvia García (Bici Verde) nas máster-40.
A xornada comezara coa categoría Infantil, marcando a pauta Marta Utrera (Armenteira e Punto) e Guillermo García (Avanza - O Porriño). A continuación, Lucas Blanco (Cambre) nos cadetes, Manuel Ángel Parada (Xesteiras) nos máster-30, Jorge Aguín (Moto Bike) nos máster-40, Antonio Rodríguez (Ourense Termal) nos máster-50 e Manuel Bugallo (Biciosos-Rías Baixas) dominaron dende a primeira volta das súas carreiras na quenda intermedia.
Os resultados en Ribadumia provocaron dous cambios de líderes. Lois Gómez (Avanza - O Porriño) vestiuse coa camisola da Copa Galicia XCO nos cadetes e Juana Vidal recuperouna nas elites. A prenda que conmemora a celebración do Campionato de Europa de Ciclocrós en Pontevedra continúan portándoa Marta Utrera e Guillermo García en Infantil; Xiana Seijo (Caimanes Betanzos) nas cadetes; Marta Estévez (XSM) e Adrián Caamaño en Júnior; Sofía Álvarez (Cambre) e Martín Sestelo en Sub-23; Rubén Deaño nos elites; Samuel Baña (Xesteiras) nos máster-30; Silvia García e Jorge Aguín en Máster-40; Antonio Rodríguez nos máster-50; e Manuel Bugallo nos máster-60.
A entrega de premios pechouse coa coroación do Cambre como gañador da clasificación por equipos da xornada. A seguinte cita da Copa Galicia XCO, a quinta das oito que compoñen o calendario, chegará o vindeiro domingo en Ponteareas.
Toda a información deste certame pode seguirse no seu apartado web e nas redes sociais a través do cancelo #CopaGaliciaXCO24.
BTT
FORMACIÓN
BTT
SELECCIÓNS
FORMACIÓN
BTT
R/ Fotógrafo Luís Ksado, 17
36209 Vigo (Pontevedra)
Tel.: 986.22.41.58
federacion@fgalegaciclismo.es