Ángel Suárez asina o seu primeiro top-10 da temporada na Copa do Mundo de Descenso

Un ano máis Ángel Suárez volve estar entre os mellores corredores de Descenso do planeta. Despois dunha serie de infortunios no arranque do curso, o rider vigués acadou a pasada fin de semana o seu primeiro top-10 na Copa do Mundo de DH coas cores do seu novo equipo, o Frameworks Racing. O catro veces campión de España clasificouse noveno en Bielsko-Biala. 

O circuíto polaco estreouse na Copa do Mundo exercendo de segunda cita puntuable da temporada. Cunha baixada en condicións óptimas para a final e un pouco de chuvia que engadiu emoción, Suárez detivo o reloxo en 2 minutos 58 segundos e 265 milésimas. O corredor olívico quedou a menos dun segundo e medio do podio e a dous segundos e medio do gañador, do irlandés Ronan Dunne (Mondraker).

"Contento de sentirme tan rápido e con boas sensacións esta finde. O equipo traballou para mellorar o set up para que me sentira máis cómodo. Súper agradecido por iso, imos a por máis", escribiu o galego nas súas redes sociais. A seguinte proba da Copa do Mundo de DH terá lugar do 7 ao 9 de xuño en Leogang (Austria).

Clasificación