A Volta a Lugo Máster celebrarase o 18 e o 19 de xullo

O pelotón máster regresará ás estradas no mes de xullo. O sábado 18 e o domingo 19 celebrarase a Volta a Lugo Máster na Ribeira Sacra. O Chantadino Master Team organiza a quinta edición desta cita prevista inicialmente para finais do pasado mes de marzo e que foi adiada por mor da crise sanitaria do COVID-19. A inscrición xa está aberta en emesports.es.

Os corredores máster-30, máster-40 e máster-50/60 disputarán un dobre sector na primeira xornada. Pola mañá, a partir das 11:00 horas, terán que percorrer 75 quilómetros con inicio e chegada en Escairón. Pola tarde, dende as 17:00 horas, a capital do concello do Saviñao repetirá como escenario dunha contrarreloxo individual de 8 km. 

O domingo a saída e a meta trasladaranse a Chantada. Ás 10:45 horas comezará a competición sobre un trazado de 70 km nos que se decidirá o gañador final absoluto da volta e os vencedores en cada categoría.

Todo ciclista retirado ou que chegue fóra de control na primeira etapa poderá tomar a saída na seguinte, pero sen poder optar a ningunha clasificación xeral. Do mesmo modo, os corredores poderán anotarse de xeito individual a calquera das etapas, sen poder optar á clasificación final por tempos. 

Máis información sobre a Volta a Lugo Máster en emesports.es e na páxina de Facebook do Chantadino Master Team.