Diego López obtén a camisola de campión de Galicia júnior no Trofeo Portus Apostoli

O Picusa Academy viviu este domingo unha xornada redonda como anfitrión do III Trofeo Portus Apostoli - Campionato de Galicia Júnior 2025. O equipo organizador, en colaboración coa Peña Ciclista Noela, logrou o triunfo na meta de Noia co valenciano Enrique Maranchón e conquistou a coroa autonómica por medio de Diego López. O corredor santiagués, segundo clasificado no Campionato de Galicia de Contra o Reloxo Individual tanto este ano como o pasado, fíxose cunha camisola que parecía resistírselle.

O percorrido de 114 quilómetros arrancou diante da Confraría de Portosín, no concello de Porto do Son, desde onde o pelotón rodou 13 km ata o inicio da primeira das catro voltas a un circuíto con epicentro na Alameda de Noia. Antes de realizar o primeiro paso polo punto que posteriormente sería a liña de meta, o portugués André Jarmela (Blackjack-Bairrada) e Enrique Maranchón consolidáronse como tándem de escapados á fronte da proba. A súa diferenza á altura do quilómetro 28 era de 54 segundos.

A situación pouco variou ata a terceira volta, cando o alxerino Mohamed Amine (Paredes-Reconco) e o portugués Francisco Massa (Crédito Agrícola) establecéronse como dúo perseguidor. Na Meta Volante do km 57, que se anotou Jarmela, a vantaxe entre as dúas parellas era de 34 segundos e o pelotón marchaba a pouco máis de 1 minuto da cabeza de carreira.

Completados os catro xiros ao circuíto, a parte final da carreira consistía nunha volta diferente, máis longa e que incluía a subida ao porto de Vilacoba. As ramplas da única ascensión puntuable para a Montaña serviron a Maranchón para descolgar a Jarmela. O representante do Picusa Academy coroou o alto -a 22 km para a conclusión- con 45” de vantaxe respecto a quen fora o seu socio na fuga e manexando 1’ de marxe sobre unha decena de unidades entre as que o seu compañeiro de equipo Diego López era o único galego.

O recital do corredor valenciano durou ata a Alameda de Noia e Maranchón levantou os brazos como vencedor despois de rodar a unha media de case 41 km/h. A 1 minuto e 12 segundos do gañador, o portugués Augusto Patricio (Escola Bruno Neves) superou ao seu compatriota Guilherme Ribeiro (Hagens Berman – Jayco) na pugna pola segunda praza. Nese mesmo grupo, sen involucrarse no esprint, tamén terminou o santiagués Diego López, que nos últimos metros festexou o título de campión de Galicia 2025 de fondo na estrada. As outras dúas prazas do podio autonómico decidíronse nun segundo grupo. Arón Lorenzo (Cambre) fíxose co subcampeionato e Xián Rodríguez (Cortizo), coa medalla de bronce. 

Os premios entregáronse ante a Casa do Concello e encargáronse de repartilos Francisco Pérez, alcalde de Noia; Sandra González, concelleira de Deportes de Noia; Carlos Lorenzo, concelleiro de Deportes de Porto do Son; Sabino Cortizo, presidente do Grupo Deportivo Cortizo – Picusa Academy; Jose Ángel Núñez, presidente da Peña Ciclista Noela; Juan Carlos Muñiz, presidente da Federacion Ciclismo Galego; Marcos Castillo, xerente de Casfer Cerramentos; Álvaro Couto, xerente de Autos Patiño; e Miguel Freire, director de Relacións Institucionais de Gadis.

PODIO DO CAMPIONATO DE GALICIA 

Júnior M

1. Diego López (Picusa Academy)

2. Arón Lorenzo (Cambre)

3. Xián Rodríguez (Cortizo)

Clasificacións