CX Pontevedra promociona o Campionato de Europa de Ciclocrós 2024 en Benidorm

Recta final do calendario de ciclocrós, cos Mundiais da disciplina ao virar a esquina e un espectáculo brutal grazas ás actuacións de Wout van Aert e Fem van Empel na última Copa do Mundo, a de Benidorm. O dobrete do equipo Visma Lease a Bike, en categoría masculina e feminina, serviu de escaparate tamén para a promoción do Campionato de Europa de Ciclocrós 2024 que se celebrará en Pontevedra.

Para aproveitar esta oportunidade de dar visibilidade a un evento que poñerá todas as miradas do ciclocrós europeo na Boa Vila, a Federación Ciclismo Galego (FCG) dispuxo un stand no que centos de afeccionados puideron coñecer o calendario de probas previstas. Espertouse así o interese de moitos deles por acudir á competición, e tamén do público estranxeiro presente en Benidorm. Será unha gran oportunidade de atraer o turismo internacional a Galicia e en concreto á provincia de Pontevedra coa súa capital como epicentro.

Por este stand tamén pasaron Lorena Patiño, recente campioa de España de ciclocrós; e Aroa Otero. Dúas promesas da disciplina que afrontan con especial ilusión a oportunidade de coroarse coa camisola de campioas de Europa na súa casa, en Pontevedra.

Aos afeccionados entregáronselles trípticos informativos, merchandising sobre o Campionato de Europa e información turística de Pontevedra e de Turismo de Galicia, facendo fincapé na celebración por primeira vez das mangas máster neste certame europeo. Isto supón a confirmación de que a participación de ciclistas practicamente duplicarase nunha proba disputada por seleccións nacionais e que ten como campións actuais a Michael Vanthourenhout (Bélxica) e Fem van Empel (Países Baixos).

Desde CX Pontevedra e a Federación Ciclismo Galego continuaranse realizando actividades de promoción para que o Campionato de Europa 2024 na Boa Vila sexa un éxito deportivo e tamén de asistencia.