A Copa de España de Descenso chega ao seu ecuador en Verín co DHI Pozo do Demo

A Copa de España de Descenso regresa á actualidade do ciclismo estatal coa disputa este próximo domingo na localidade ourensá de Verín da terceira proba puntuable para o seu calendario 2024: o DHI Pozo do Demo, organizado polo Bicicletas Chinquena Racing Team, que contará coa categoría C2 UCI internacional e con preto de 200 participantes.

Verín está rodeada de montañas con inmensos piñeirais, carballeiras e castiñeiros entre os que se celebrará este DHI Pozo do Demo, que propoñerá un descenso de 1,7 km. de distancia que contará con máis de 350 metros de desnivel negativo. Un auténtico desafío para os mellores baixadores do noso país.

A esta terceira proba da Copa de España de Descenso, chegan como líderes da xeral Iago Garay, con 306 puntos, e Ela Conolly, que acumula 480 puntos. Ningún dos dous estará presente nesta cita do Pozo do Demo, polo que verán aproximarse ou mesmo superarlles aos seus perseguidores. Como principais favoritos ao triunfo postúlanse entre os homes Daniel Casteláns, que no seu primeiro ano como sub-23 xa logrou a vitoria en Otívar, Orion Kirchmayer, Yelco Romero, Juan Guillamón, Jon Pardo, Iraitz Etxeberría ou Antonio Royo. No que respecta á competición feminina, cabe destacar a presenza de Sara Yusto, das irmás Zamora, Kira e Zoe, de Inés Chinchilla e das juniors Natalia Menéndez, Candela Ruiz e María Pomés.

Xa o venres comezarán as revisións a pé do circuíto, que se producirán entre as 15:00 h. e as 19:00 h. O sábado terán lugar os adestramentos oficiais, cunha quenda matinal e outra verspertina; mentres que o domingo a competición arrincará ás 9:00 h. coa clasificatoria. A decisiva final celebrarase a partir das 12:00 h.

Máis información