Iván Montero, Óscar López e José Antonio Bugarín suman vitorias e podios en Canarias

Os tres corredores galegos que viaxaron ata as Illas Canarias para participar na dobre cita inaugural da Copa de España de Ciclismo Paralímpico non se baixaron do podio. O handbiker Iván Montero (Neuroimpulse Galicia), con dúas vitorias, comandou a actuación dos representantes da nosa comunidade durante a pasada fin de semana en San Bartolomé de Tirajana (Gran Canaria). Entre os tres primeiros das súas clases tamén estiveron os paraciclistas de bicicleta adaptada Óscar López (Neuroimpulse Galicia) e José Antonio Bugarín (ODL Team).

O primeiro día de competición do Gran Premio Copa Cabildo de Gran Canaria estivo dedicado ás carreiras en liña e a segunda xornada, ás contra o reloxos. O camiño cara ao seu sétimo título no certame estatal iniciouno o arteixán Iván Montero cun dobre triunfo en MH5. O seu compañeiro de equipo Óscar López tamén defende a coroa da Copa en MC3. O larachés fixo segundo o sábado e terceiro o domingo. En ambas probas impúxose outro corredor do Neuroimpulse Galicia, o balear Adrián Planells. 

O mesmo resultado asinou tanto na carreira como na 'crono' o porriñés José Antonio Bugarín en MC5. O paraciclista do ODL Team-Lasal Cocinas Craega rematou terceiro por detrás dos madrileños Julio Pedro Blasco (Neuroimpulse Galicia) -vencedor o sábado- e Manuel Pérez (ODL Team) -primeiro o domingo. 

A Copa de España consta esta campaña de seis eventos. O terceiro e o cuarto terán como escenario a localidade murciana de Ceutí na última fin de semana de marzo. 

Máis información