A categoría Infantil pechou a rolda das Xornadas de Tecnificación FCG de Estrada

A pasada fin de semana resultou do máis intensa para o pelotón Infantil. O sábado celebrouse en Viveiro a primeira edición do seu Campionato de Galicia en ruta e esta categoría encargouse o domingo de pechar a rolda do ano 2024 de Xornadas de Tecnificación FCG de Estrada. Un total de 23 ciclistas participaron na activade celebrada no Porriño grazas á inestimable colaboración deste concello pontevedrés. 

As rapazas e os rapaces que recibiron a citación de Jacobo Ucha adestraron ás ordes do técnico da Federación Ciclismo Galego na pista de ciclismo de Torneiros. Estas convivencias están deseñadas para avaliar o nivel das corredoras e dos corredores, ofrecerlles consellos e, ao mesmo tempo, estreitar lazos antes de asistir a competicións para defender as cores da Selección de Galicia. No caso desta categoría, o seu Campionato de España terá lugar en Avilés na primeira semana de xullo. 

Con esta Tecnificación completouse o calendario destas citas formativas para as promesas do pelotón de Estrada. Comezou en xaneiro coa concentración Sub-23 masculina en Vilagarcía e dende entón aplicouse o mesmo método de traballo na xornada dedicada aos juniors en Cambre, na do ciclismo feminino en Betanzos e na dos cadetes que tivo como escenario Ponteareas.