Rebeca Dávila fixo cuarta na final BMX Pro de O Marisquiño

O regreso de O Marisquiño ofreceulle a posibilidade a unha viguesa de volver competir como local nunha proba do calendario UCI Elite Women. Rebeca Dávila participou na final BMX Pro do festival olívico e obtivo a cuarta posición. A rider do Cromoly quedou ás portas de repetir o posto de podio asinado no 2018. 

A mellor no park foi a número un desta especialidade en España. A pucelana Teresa Fernández-Miranda venceu cunha puntuación de 81,67, superando á alemá Lara Marie Ertel (77,3) e á madrileña Mar Esquer (65.00). 

Os xuíces outorgáronlle un total de 58,67 puntos a Dávila. A viguesa levaba dous anos sen poder amosar os seus trucos no gran evento de deporte urbano da súa cidade. Perdeuse a edición do 2019 ao estar lesionada e O Marisquiño non se puido celebrar no 2020 por mor da pandemia. 

O BMX Cromoly si que pisou o caixón no BMX Street Pro. O local Saúl Vilar, de 14 anos, conseguiu a terceira posición. 

Retransmisión da TVG2