Diego Álvarez e Susana Alonso apuntalan os seus liderados da Copa Galicia XCM en Carral

Pleno de vitorias para os portadores das camisolas da Copa Galicia XCM este domingo en Carral. Cos elites Diego Álvarez (V Bikes) e Susana Alonso (Extol MTB Team) acadando por segundo ano consecutivo os triunfos absolutos no desafío coruñés, un total de nove líderes repetiron éxito unha semana despois de que o certame autonómico para as e os fondistas do BTT arrancara en Viveiro. As clasificacións xerais do circuíto de maratóns coordinado pola Federación Ciclismo Galego resolveranse o 27 de agosto en Guitiriz. 

O II BTT Carral XCM propuxo un percorrido de 60 quilómetros, con máis de 1.800 metros de desnivel positivo acumulado, polas pistas forestais e estradas dos concellos de Carral, Cambre, Culleredo, Abegondo, Ordes e Cerceda. Entre o pelotón da carreira da Copa Galicia e o da marcha cicloturista, máis de 150 bikers tomaron a saída nun evento que acumulou eloxios polo deseño do seu itinerario e polos servizos que ofreceu o Club BTT Carral como entidade organizadora. 

Dos tres corredores elites que alcanzaron o treito final do maratón con opcións de anotarse a vitoria absoluta, dous pertencen ao V Bikes. Esa superioradade numérica non a desaproveitou o gañador sete días antes en Viveiro. O tudense Diego Álvarez volveu impoñerse por diante de Rubén Deaño (Ourense Termal), nesta ocasión cun tempo de 2 horas 52 minutos e 14 segundos e dun xeito máis axustado que na Mariña Lucense. Esta vez a diferenza entre os dous primeiros foi de 23 segundos. A terceira posición, a 1'40" do seu compañeiro de equipo, correspondeu a Brandán Márquez. 

O líder sub23 Iván Belmonte (High Level) fíxose co cuarto posto absoluto tras chegar á liña de meta xunto ao elite Javi Busto (Extol) a máis de 6' do primeiro clasificado. A continuación, entraron tres masters que encabezan as xerais dos seus grupos de idade. O máster-30 Manuel Casuso (Xesteiras) rematou sexto, o máster-50 Francisco Xavier López Cedrón (MTC) ocupou a sétima praza e o máster-40 Diego Rey (Tambre Bike), a oitava. O cadro de vencedores masculinos completárono os líderes júnior Adrián Caamaño (Caimanes Betanzos) e máster-60 Pedro Delgado (Ultreia). 

Novo 'dobrete'

En Carral coroáronse os mesmos gañadores absolutos que no 2022. No caso da competición feminina, o Extol MTB Team rubricou un 'dobrete' idéntico ao da Viveiro Bike Xtreme. A mosense Susana Alonso, cun rexistro de 3:39:39, chegou á meta 4'56" antes de que o fixera Eva Ortega. As dúas corredoras da formación do Deza distanciáronse amplamente do resto de corredoras. As tamén elites Cecilia Abal e Desiree Fernández, ambas do Ribadumia, obtiveron a terceira e a cuarta posición, respectivamente.

As outra tres finishers foron masters. A líder máster-30 Sofía da Silva (Extol) terminou quinta, batendo á biker do seu mesmo grupo de idade Carolina Díez (Policíal Local de A Coruña), e o sétimo posto de María Iglesias (Xtrembike) outorgoulle a primeira posición no ranking máster-40 da Copa Galicia.

Despois de dous domingos seguidos de carreiras, o certame autonómico de XCM descansa durante dúas semanas para regresar o 27 de agosto coa súa clausura, a VII Ruta BTTeiros Cova da Serpe en Guitiriz.

Toda a información sobre a Copa Galicia de Cross Coutry Maratón podes atopala na súa sección dentro desta mesma páxina web e nas redes sociais a través do cancelo #CopaGaliciaXCM23.

Clasificacións