Pablo García vence en Vigo e Daniel Cavia álzase coa Copa de España Elite e Sub-23 2024

A Copa de España Elite e Sub-23 de ciclismo en Estrada chegou este domingo ao seu final coa vitoria dun xigantesco Pablo García (Polti-Kometa) en Vigo, onde completou un dobrete xenial facéndose coas dúas últimas probas do certame estatal. A cidade olívica vibrou tamén coa vitoria na xeral de Daniel Cavia (Padronés-Cortizo), cuxa sexta praza valeulle para desbancar na xeral a Haimar Etxeberria (Finisher-Kern Pharma), que non puido sumar puntos na última cita.

O C.C. Rías Baixas, organizador da proba, volveu a propoñer o trazado máis duro do certame, con 180 quilómetros de percorrido e un total de seis pasos de montaña no que os ciclistas acumularon 4000 metros de desnivel positivo. Ao redor do quilómetro 25 formábase a fuga que protagonizou a xornada, composta por cinco ciclistas do Padronés-Cortizo Hugo de la Calle, José Luis Faura, Pablo Bonilla, Samuel Flórez e Marc Torres; Pablo García, Antonio González e Martín Barrero (Polti Kometa), Jan Castellón e Álex Díaz (Caja Rural-Alea), Iker Trigo e Xabier Cerro (Laboral Kutxa), Raúl Bastida (Telco On Clima Osés), Jorge Gálvez (Zamora Enamora), Alberto Álvarez (Extremadura Pebetero), Ewan Warren (Brocar Alé) e Gabriel Rodas (High Level).

A fuga, que chegou a manexar diferenzas de sete minutos co pelotón, viu como aos poucos, e tras perder Etxeberria contacto co pelotón na subida a Aloia, os corredores do Cortizo íanse descolgando para axudar a Daniel Cavia a chegar á cabeza de carreira; unha situación que se producía a falta duns 40 quilómetros para o final.

Ewan Warren e Jan Castellón tentábano en solitario pouco despois durante algúns quilómetros, aínda que a dureza do percorrido e o bo entendemento por detrás neutralizaba a fuga e chegábase a Vigo con todo por decidir. Xa dentro dos últimos dous quilómetros movíase Pablo García, ao que só podía seguir en primeira instancia un gran Jorge Gálvez, que non podía evitar que García volvera alzar os brazos por segunda vez esta fin de semana en Galicia, nesta ocasión no Monte do Castro. En terceira praza concluía Álex Díaz, mentres que Daniel Cavia finalizaba nunha sexta praza que lle valía para erixirse en novo campión da Copa de España Elite e Sub-23 2024. Haimar Etxeberria quedaba sen sumar puntos e dicía adeus ao liderado tras un fabuloso desempeño durante todo o certame estatal.

Javier Ibáñez (Caja Rural-Alea) conseguiu defender a súa posición de líder elite, concluíndo ademais terceiro na xeral.

Clasificación

Máis información

Fonte: RFEC