Iván Montero cumpre como líder MH5 da Copa de España de Ciclismo Adaptado en Ciudad Real

05 DE JULIO DE 2022

Ángel López clasificouse terceiro en MH2

Ivan-Montero-cumpre-como-lider-MH5-da-Copa-de-Espana-de-Ciclismo-Adaptado-en-Ciudad-Real-

Foto: LP's Photography

A Copa de España de Ciclismo Adaptado reactivouse o domingo en Ciudad Real despois de tres meses de paréntese, un regreso que se saldou con dous postos de podio para os handbikers galegos. Sobre o asfalto manchego, Iván Manoel Montero (ParaciclismoGalicia) exerceu de líder MH5 sumando un novo triunfo na súa conta e Ángel López (Inclusivo Enki) clasificouse terceiro en MH2.

O Gran Premio Ayuntamiento de Ciudad Real, terceira xornada do certame estatal, disputouse cun formato que consistía en competir durante unha hora e dar unha volta extra ao circuíto de 3 quilómetros. Invicto nesta edición da Copa, Iván Montero cumpriu co seu papel de primeiro na xeral MH5. O coruñés xa ten matematicamente certificado o título.

A participación de paraciclistas galegos limitouse nesta ocasión ás handbikes masculinas. O Inclusivo Enki acudiu con tres representantes autonómicos e ademais da terceira posición de Ángel López en MH2 obtivo a oitava e a novena en MH3, respectivamente, de Alejandro González e Daniel Prada. 

O segundo evento estival desta Copa de España está fixado para o 7 de agosto moi preto de Galicia, na localidade berciana de Bembibre. 

 

Clasificacións Ciudad Real

 

R/ Fotógrafo Luís Ksado, 17
36209 Vigo (Pontevedra)
Tel.: 986.22.41.58
federacion@fgalegaciclismo.es