Aprobado o apaixonante calendario 2021 do ciclocrós galego: 17 probas, dúas delas internacionais

A Asemblea Xeral Extraordinaria celebrada este venres pola Federación Ciclismo Galego aprobou o calendario de ciclocrós autonómico da temporada 2021. Dende o 2 de outubro ata o 26 de decembro hai programados dezasete probas na nosa comunidade. Aos especialistas sobre a lama agárdalles unha temporada apaixonante, tanto pola cantidade de citas como pola súa calidade. 

A cifra de eventos supera á de antes da pandemia e nesta intensa axenda consolídanse dúas competicións de carácter internacional. Ambas disputaranse na fin de semana do 9 e do 10 de outubro. O sábado está reservado para o Gran Premio Cidade de Pontevedra, que sobe de categoría e alcanza o nivel C1 da Unión Ciclista Internacional. Ademais, a xornada organizada pola FCG na Illa das Esculturas abrirá o calendario da Copa de España 2021.

Ao día seguinte, o domingo, tamén se repartirán puntos UCI no Ciclocross Internacional XaxanCX, o evento C2 impulsado polo XSM. Polo tanto, o espectáculo está garantido nas Rías Baixas durante a fin de semana da ponte do Pilar grazas a unha participación que será de luxo. 

De aperitivo a esta agardada dobre cita exercerá a apertura da Copa Galicia. No arranque do mes de outubro o V Ciclocross Concello de Pontevedra, o sábado 2, e o IV Ciclocross Poio Móvose, o domingo 3, servirán para abrir boca de cara á seguinte fin de semana e lanzar o certame autonómico, que esta campaña consta de catorce xornadas. 

Unha das novidades na Copa deste ano é o descarte dos catro peores resultados. A lista de carreiras mestura probas clásicas con outras que se estrean. O ciclocrós da Guarda, A Cañiza, Ribadumia e o dedicado a Borja Gómez Méndez en Ponteareas, que pechará o calendario, vivirán a súa primeira edición. 

CALENDARIO COPA GALICIA

O punto final a esta campaña porase, como é habitual, co Campionato de Galicia. As coroas autonómicas do 2021 repartiranse o 26 de decembro na provincia de Ourense, no XIV Ciclocross Castelo de Maceda. Unha despedida por todo o alto e o último gran test antes do Campionato de España, do 7 ao 9 de xaneiro, en Xátiva. 

CALENDARIO GALEGO COMPLETO