Os líderes da Copa Galicia Máster saen reforzados da Challenge As Rías Baixas

Máis dun mes despois da súa apertura no Memorial Fernando Abad, a Copa Galicia Máster regresou o pasado sábado na Challenge As Rías Baixas. A primeira etapa do evento organizado polo Máster da Louriña repartiu puntos para o certame autonómico na súa chegada a Mos. Nunha tirada que incluíu un treito de sterrato, venceu o máster-30 Samuel García (Norinver) e os outro dous líderes da xeral, o máster-40 Iago Alonso (Chantadino) e o máster-50 Juan Manuel Toribio (Aerodynamics), ampliaron as súas vantaxes á fronte dos rankings. 

O Gran Premio Concello de Mos ofreceu o sábado pola mañá un percorrido de 75 quilómetros propio dunha clásica. A subida ao Alto de Santiaguiño tiña como gran atracción os 800 metros de sterrato a un desnivel medio do 5% e a liña de meta estaba situada na zona adoquinada do Pazo de Mos. Lucindo a camisola de líder máster-30 da Copa Galicia, Samuel García presentouse en solitario nos metros finais e anotouse o triunfo con 6 segundos de marxe sobre o portugués Fabio Martins (Proteu). Outro corredor luso, o máster-40 Luis Lameira (Skoda), rematou terceiro a 19" do representante do Norinver. 

O grupo que pelexou polo cuarto posto entrou comandado polo cántabro Óscar Negrete (Unidos por un Reto-Mola), primeiro máster-50 da etapa, e entre os ciclistas que finalizaron a súa roda estivo Iago Alonso, facendo terceiro nos máster-40 por detrás de Iván Vidal (Lasal Cocinas-Louriña) e ratificando a condición de líder no seu grupo de idade. Tampouco cambiou de propietario o maillot máster-50 da Copa Galicia ao clasificarse segundo nesta categoría o asturiano Juan Manuel Toribio, que alcanzou a meta nun segundo grupo, e sumar 20 puntos máis que José María Tajes (Norinver), a súa principal ameaza na xeral. 

Nidia Arévalo, alcaldesa de Mos, participou na entrega de premios xunto a Juan José Álvarez, presidente do club organizador, e a Juan Carlos Muñiz, presidente da Federación Ciclismo Galego. O certame autonómico resolverase o 24 de xuño coa súa terceira e última cita, o Trofeo de Ciclismo Concello da Estrada. Toda a información sobre a Copa Galicia Máster podes atopala nas redes sociais a través do cancelo #CopaGaliciaMaster23 e na súa sección dentro da nosa páxina web. 

A sétima edición da Challenge As Rías Baixas continuou o sábado pola tarde en Ponteareas cunha contra o reloxo individual de 6 km na que repetiu triunfo Samuel García, mellorando en 4" o tempo de Fabio Martins e en 6" o do máster-40 asturiano José Ignacio Méndez (Aerodynamics).

A rolda que transitou polas estrada do sur da provincia de Pontevedra terminou o domingo no Porriño con vitoria parcial de Mikel Núñez (Lasal Cocinas-Louriña) tras 85 km de percorrido. O ciclista vasco da formación anfitrioa bateu ao esprint a Óscar Negrete e ao máster-40 Francisco Javier Iglesias (Cidade de Santiago), segundo e terceiro respectivamente. No máis alto da xeral non houbo cambios e Samuel García proclamouse vencedor absoluto.

Clasificacións