Calcetíns inclusivos para a Selección de Galicia de Ciclocrós

Estrea con significado da Selección de Galicia. As corredoras e os corredores que defenderán as cores do combinado autonómico esta semana, dende o venres ata o domingo, no Campionato de España de Ciclocrós lucirán na localidade valenciana de Xàtiva uns calcetíns inclusivos. Un agasallo cortesía de Maldita Buena Suerte. 

A firma coruñesa regala á Selección este complemento para o seu vestiario, unha idea orixinal coa que se realiza unha chiscadela ás rapazas e aos rapaces con síndrome de Down. Do mesmo xeito que acontece co deseño dos calcetíns, non todos somos iguais e esa diversidade debe reivindicarse. 

A Federación Ciclismo Galego segue tendo como unha das súas prioridades a inclusión das persoas con capacidades diferentes. Diversidade e integración, dous conceptos que mellor que ninguén representa Borja Gómez Méndez, o ciclista ponteareán que un ano máis competirá no Campionato de España de Ciclocrós coa Selección de Galicia.