Damián Ramos disputará por cuarto ano consecutivo o Mundial de Ciclismo Paralímpico en Estrada

A selección española vén de anunciar a súa convocatoria para o Campionato do Mundo Paralímpico de Estrada que se celebrará do 28 ao 31 de agosto en Ronse (Bélxica) e na lista confeccionada pola seleccionadora Begoña Luis Pérez está Damián Ramos. O corredor coruñés do Lasal Cocinas - Craega participará por cuarto ano consecutivo na cita que pon en xogo as camisolas coas cores do arco da vella. O venres, día 29, disputará a proba contra o reloxo individual da clase 4 de bicicleta adaptada e o domingo 31 volverá ser o único representante de España na carreira en liña da súa categoría. 

Medallista nos Xogos Paralímpicos de París, o podio do Mundial resistiúselle ata o de agora. O ano pasado obtivo o quinto posto na CRI e o sexto na competición de fondo en Zúrich (Suíza). Máis preto do caixón quedara a temporada anterior en Glasgow, cunha cuarta praza na 'crono' e un quinto no esprint polo bronce da carreira en liña. 

Máis información