Jesse Maris reina nas montañas da Mariña Lucense

O portador da camisola amarela da Volta a Galicia Elite e Sub-23 defenderá este domingo unha renda de 9 segundos na clausura dos catro días de competición en Ferrol. O ucraíno Maksym Bilyi (Equipo Cortizo) non o tivo nada doado, pero mantívose como líder na etapa raíña. Nunha fermosa xornada de ciclismo percorrendo a costa e as montañas da Mariña Lucense, varios ataques puxeron en xaque ao primeiro clasificado na xeral e o corredor máis combativo, o estadounidense Jesse Maris (Technosylva), culminou a súa exhibición erguendo os brazos na liña de meta de Barreiros. 

A terceira e penúltima tirada presentábase como a máis longa, ao alcanzar os 147 quilómetros, e tamén a máis esixente, con catro portos puntuables e 2.500 metros de desnivel positivo acumulado, da 23ª edición da rolda organizada pola Federación Ciclismo Galego. O primeiro punto quente atopábase preto da saída, a Meta Volante de Ribadeo no km 13, onde impuxo a súa potencia José María Martín (Extremadura Pebetero) e Maksym Bilyi rabuñou 1 segundo de bonificación para ampliar o seu colchón como líder. 

Pola segunda Meta Volante, a da Pontenova no km 45, pasou primeiro Daniel Cepa (Caja Rural - Alea) e a continuación, nas ramplas iniciais da ascensión ao Marco de Álvare, formouse unha fuga de 12 corredores, entre eles o segundo clasificado na xeral José Autrán (Supermercados Froiz). A vantaxe superior aos 40" sobre o pelotón, a máxima da que desfrutou a escapada, convertía en líder virtual ao chileno. Desa ducia de aventureiros saltou Jesse Maris, que chegou a gozar dunha diferenza de 45" ao seu favor e pasaría en solitario polo cumio do alto. 

Ataques ao líder

O estadounidense, de 21 anos, marcouse un póker e puntuou primeiro nos catro portos da xornada, o primeiro de 3ª categoría e os outros tres de 2ª. O de Augaxosa subiuno de novo como integrante da escapada logo de ser alcanzado e o traballo no pelotón do Equipo Cortizo daba os seus froitos camiño do Alto de Fórnea, neutralizando a todas os fugados. A partir de aí pasou ao ataque o Caja Rural - Alea. O conxunto navarro lanzou a Pablo Lospitao e xunto ao estremeño marchouse Jesse Maris. O representante da escuadra berciana do Technosylva destacábase a pouco de coroar mentres que por detrás o propio líder Bilyi víase obrigado a responder aos ataques ao quedarse momentaneamente sen compañeiros. 

A carreira reagrupouse no descenso, antes dun paso intermedio pola meta de San Cosme con puntos para as Metas Volantes e segundos para a xeral en xogo. José María Martín dominou un vibrante esprint por diante do francés Darío Giuliano (Caja Rural - Alea), que grazas á bonificación de 2" se colocaba segundo na xeral, e de Bilyi. O ucraíno contou na aproximación á última ascensión co traballo dos seus gregarios Iban Gutiérrez e Óscar Fuentes para conducir ao reducido pelotón ata o Monte Comado. Nesa subida abriron oco Antonio González (Caja Rura-Alea) e -unha vez máis- Maris, que sufrira unha picada antes do porto. O tándem de cabeza comezou o descenso, a falta de 13 km, cunha vantaxe de 20 segundos. 

A diferenza achegouse ao medio minuto, o que situaba ao ciclista soriano como primeiro na xeral, pero do grupo perseguidor tiraron o Extremadura Pebetero e o Supermercados Froiz para buscar unha resolución ao esprint. O dúo de Maris e González resistiu, aínda que só por 5", unha marxe suficiente para que o estadounidense obtivera o triunfo de etapa en San Cosme, a capital do concello de Barreiros. O máis rápido na pugna polo terceiro posto foi o portugués João Silva (Porminho). 

Bilyi salvou o liderado e continúa comandando a xeral coa mesma renda coa que iniciou a tirada. O segundo posto corresponde a Dario Giuliano e o terceiro clasificado, José Autrán, está a 11" do ucraíno. O maillot da Montaña recibiuno no podio Maris; o das Metas Volantes, José María Martín; o de primeiro sub-23, Giuliano; e o de mellor galego, o noiés Ángel Maneiro (Supermercados Froiz). 

A Volta a Galicia que homenaxea a Samuel Blanco conclúe este domingo en Ferrol, con saída ás 10:30 dende a Praza de Armas e final ao redor das 13:30 h na Autoridade Portuaria. Os 130 km da derradeira tirada divídense en dúas partes. A primeira consistirá en circular por diferentes concellos de Ferrolterra, un itinerario que inclúe a Meta Volante de San Sadurniño (km 18) e o Alto de Moeche (km 23), de 3ª categoría. O primeiro paso pola liña de meta do peirao de Curuxeiras, no km 75, e o segundo, no km 102,7, exercerán de Metas Volantes e de inicio dun circuíto ao que se darán dúas voltas. Neste desenlace sobresae o Alto da Bailadora, de 3ª categoría. A segunda vez que se supere, só quedarán 8 km para o remate. 

Retransmisión da 3ª etapa