A entrada será libre no Campionato de Europa de Ciclocrós 2024 en Pontevedra

Grandes noticias para os amantes do ciclocrós e para os afeccionados que queiran vivir e gozar do Campionato de Europa 2024. No seu compromiso con albergar os mellores espectáculos deportivos de carácter internacional, o Concello de Pontevedra garante o acceso libre ao circuíto da Illa das Esculturas, á beira do Río Lérez, onde se vivirá a pelexa polos títulos continentais de ciclocrós.

Habitualmente, as competicións de ciclocrós de maior prestixio en Europa e Estados Unidos requiren da compra de entradas para acceder aos recintos e circuítos onde se disputan as probas. Algo que tamén no noso país sucede coa Copa do Mundo de Benidorm, de recente creación pero de enorme éxito. Para tratar de ampliar ao máximo a convocatoria de público e á vez animar a calquera veciño da cidade para vivir o Campionato de Europa a principios de novembro, o Concello de Pontevedra dispuxo que a entrada sexa libre, polo que se esperan varios miles de asistentes para un dos grandes eventos ciclistas do ano.

A edición 2024 do Campionato de Europa de ciclocrós supón, ademais das tradicionais probas elite, sub-23 e júnior, tanto masculina como feminina, a celebración por primeira vez das mangas máster neste certame europeo. Desta maneira, a participación de ciclistas practicamente duplicarase nunha proba disputada por seleccións nacionais e que ten como campións actuais a Michael Vanthourenhout (Bélxica) e Fem van Empel (Países Baixos) en categoría elite.

Desde CX Pontevedra e a Federación Ciclismo Galego continuaranse realizando actividades de promoción para que o Campionato de Europa 2024 na Boa Vila sexa un éxito deportivo e tamén de asistencia.

Máis información