Sete ciclocrosistas galegos entran na convocatoria de España para o Campionato de Europa de Pontevedra

Representación histórica do ciclocrós galego para o seu Campionato de Europa. Sete especialistas da nosa comunidade forman parte da convocatoria de España para a gran cita continental que terá como escenario Pontevedra a vindeira semana. Miguel Rodríguez (Supermercados Froiz), Laura Mira (Team Farto - BTC), Tomás Pombo (Padronés - Cortizo) e Aroa Otero (Supermercados Froiz) en Sub-23, e Néstor Frías (Academia Postal - Maceda), Lorena Patiño (XSM) e Raúl Puelles (Caimanes Betanzos) en Júnior aparecen na lista de 27 ciclocrosistas confeccionada polo seleccionador Pascual Momparler. 

O combinado estatal competirá no circuíto da Illa das Esculturas o sábado 2 de novembro, xornada reservada para o Team Relay, e o domingo 3, cando se disputarán as carreiras Júnior, Sub-23 e Elite. Da nómina galega na convocatoria da selección anfitrioa, cinco ciclistas xa luciron as cores de España nun Europeo de CX. Os dous debutantes son os júnior Néstor Frías e Raúl Puelles.  

O resto da citación publicada este xoves pola Real Federación Española de Ciclismo cómpoñena Felipe Orts, Kevin Suárez, Mario Junquera, Lucía González, Sofía Rodríguez, Lucía Gómez e Alicia González en Elite; Naia Quintanilla, Adriana Alguacil, Raúl Mira e Emilio Reinoso en Sub-23; e Benjamín Noval, Sergio Gámez, Martín Fernández, Martí Martínez, Lidia Castro, Naia García, Maier Olano, Ana López e Aitana Gutiérrez en Júnior. 

Será unha fin de semana de ciclocrós ao máis alto nivel, nunha competición que organizará a Federación Ciclismo Galego co impulso fundamental do Concello de Pontevedra, da Deputación de Pontevedra e da Xunta de Galicia. 

Máis información