Calendario provisional do ciclocrós galego 2022-2023

O ciclocrós galego volve bater o seu récord na temporada 2022-2023. Dende o 8 de outubro ata o 6 de xaneiro a nosa comunidade será o escenario de 20 probas: as 5 primeiras serán de carácter internacional, as 14 seguintes da Copa Galicia e a última, xa no 2023, exercerá de campionato autonómico. 

Dos 17 eventos que se celebraron a pasada campaña, repiten 15. As incorporacións son o Ciclocrós Internacional Lago das Pontes (12 outubro), o Ciclocrós Apersa Audi Concello de Barbadás (19 novembro), a I Proba Concello de Santiso (4 decembro), o Gran Premio Ciclocrós Deputación de Lugo (8 decembro) e o Trofeo A Laboral (31 decembro).

Outra das novidades vivirase na xornada inaugural da Copa Galicia. O V CX Caimanes Betanzos disputarase en horario nocturno.

Citas internacionais

O repóker de probas pertencentes ao calendario UCI (Unión Ciclista Internacional) concentrarase no mes de outubro. Durante oito días Galicia converterase na referencia do ciclocrós en Europa. O día 8 abrirase este bloque de competicións co Gran Premio Cidade de Pontevedra, que por segundo ano consecutivo gozará da categoría UCI C1. A Illa das Esculturas acollerá un novo ensaio xeral o ensaio xeral para o Campionato de Europa que no 2024 terá lugar no circuíto ao carón do Lérez.  

Repetindo a fórmula das últimas temporadas, ao día seguinte (9 de outubro) o Ciclocross Internacional XaxanCX pechará a fin de semana. A xornada dominical organizada polo XSM de Marín no trazado de Chan de Gagán mantense como evento C2, o mesmo rango que as tres probas que se estrearán no panorama UCI. 

O 12 de outubro, festivo estatal, chegará a primeira edición do Ciclocrós Internacional Lago das Pontes, evento impulsado polo Club Ciclista Vilalba-As Pontes. A localidade coruñesa entra pola porta grande no calendario e exercerá de ponte con outra fin de semana de dobre cita con esta modalidade na provincia de Pontevedra.

O Concello de Ribadumia recuperou o pasado mes de novembro a súa aposta polo CX, quince anos despois de ter vivido un Campionato de España, e o vindeiro 15 de outubro dará un paso máis co bautizo do seu Ciclocrós Internacional. Ao mesmo desafío que o Club Ciclista Ribadumia lánzase o Club Ciclista Corbelo. Tras poñer en marcha no 2020 o Ciclocrós Con da Romaíña-Concello de Sanxenxo, na súa terceira edición a proba lucirá por primera vez no seu nome a catalogación de Internacional.