Os resultados do Enduro da Picaraña non se computan para a Copa Galicia

Unha vez reunida a Comisión Técnica da Federación Ciclismo Galego (FCG), coa presenza e asesoramento do Comité Técnico de Árbitros (CTA) e a participación en calidade de convidado de José Pose -presidente da ADC A Picaraña-, acordouse anular os puntos do IV Enduro das Rosquillas ADC Picaraña-Biziebike no cómputo total da Copa Galicia de Enduro 2023.

Nesta xuntanza expuxéronse as incidencias detectadas na cronometraxe dos treitos da proba celebrada o pasado 21 de maio no concello pontevedrés de Ponteareas. Despois de analizar os arquivos e as correccións feitas pola empresa externa de cronometraxe, continúanse detectando posibles erros polos cales non se pode garantir que as clasificacións finais foran as correctas.

Deste modo, a Comisión Técnica da FCG anula os puntos repartidos nesta proba e, ao mesmo tempo, pide desculpas aos corredores afectados por esta resolución.