Ángel Maneiro e Tamara Seijas asinan o dous de dous en Silleda

Tamara Seijas (Eneicat) e Ángel Maneiro (Toxo) repetiron triunfo na segunda etapa da Transgalaica organizada este domingo en Silleda. Ambos bikers, que xa lograran gañar na proba celebrada en Ames o pasado 1 de marzo, impuxéronse nunha proba de 68 quilómetros e 1.585 metros de desnivel, con 314 participantes rexistrados.

Ángel Maneiro e Tamara Seijas volveron marcar o paso na Transgalaica 2026, esta vez en Silleda, onde ambos reforzaron o seu dominio no arranque do circuíto con senllos triunfos. O corredor do Toxo P.C. adxudicouse a xeral masculina cun tempo de 2:47:42,9 tras impoñerse por só 2,9 segundos a Álex García Vázquez (Mondraker), mentres Rubén Deaño Cajide (Ourense Termal) completou o podio. Na proba feminina, a lalinense volveu mostrarse intratable e levou a vitoria con 3:18:46, por diante de Raquel Román Sarmiento (Extol) e Mar Delgado González (Xesteiras).

A xornada volveu converter a Silleda nunha das prazas fortes do BTT galego. O percorrido oficial, con saída desde A Bandeira, dividíase en dúas voltas de 37 e 31 quilómetros para completar un total de 68, cun desnivel positivo próximo aos 1.600 metros e paso por Manduas, Negreiros, O Castro, Saídres, Carboeiro, Breixa, Pazos e Abades, con enclaves como o miradoiro da Fervenza do Toxa e o mosteiro de Carboeiro. A esa dureza sumouse un punto de control no quilómetro 37, un elemento que volveu endurecer aínda máis a selección da carreira e a premiar a regularidade dos corredores máis fortes.

A clasificación da Transgalaica do Futuro comandouna Xurxo Piñeiro (Terra Chá Vilalba) e por equipos impúxose o Club de Montaña Xesteiras. A vindeira cita deste certame de Cross Country Maratón chegará o 29 de marzo en Cerdedo-Cotobade. 

Clasificacións 

Fonte: Faro de Vigo