Manuel Parada e Teresa Barreira dominan o Campionato de Galicia BTT Maratón - Viveiro Bike Xtreme

Nove bikers coroáronse campións de Galicia de BTT Maratón este sábado na Viveiro Bike Xtreme. Un selectivo percorrido de 65 quilómetros polos montes da Mariña Lucense puxo a proba a capacidade de resistencia dos participantes na última cita da temporada autonómica de Cross Country Maratón (XCM). O máster-30 Manuel Parada (Club de Montaña Xesteiras) e a elite Teresa Barreira (Extol MTB Team) dominaron o desafío proposto pola Peña Ciclista Lar.

Despois de non poder celebrarse no 2020 por mor da pandemia, o Campionato de Galicia XCM rexurdiu nun trazado no que se acumulan 2.500 metros de desnivel positivo. Malia non ser a súa especialidade, Manuel Parada xa avisara na clausura da Copa autonómica do rendemento que pode ofrecer nas distancias longas e o de Aguiño consagrouse como fondista en Viveiro.

“O circuíto adaptábase ás miñas condicións. Ten baixadas técnicas, nas que se poden abrir distancias, e as subidas son longas e con bastante inclinación. É dos percorridos máis esixentes que coñezo, é durísimo. Eu vin no 2016 e estaba nunhas condicións impracticables. Hoxe parecía que a bici corría moito máis”, comentou o gañador esta temporada do Open de España de Cross Country Olímpico (XCO) na categoría máster-30.

Parada e o máster-40 asturiano Javier del Cueto (La Deva) puxeron terra de por medio no primeiro terzo da proba e ao paso por Landrove, punto de control do km 28, a súa diferenza respecto ao seu perseguidor, o elite Saúl López (Academia Postal-Abanca), roldaba os dous minutos. O tamén elite Javier Busto (Extol), que acabaría conectando co representante do Maceda, cedía catro minutos e medio.

A unidade no dúo de cabeza rachouse na segunda ascensión, co corredor do Principado lanzándose ao ataque. “Non quixen meterme nese cambio de ritmo porque o podía acusar na parte final. Aí estivo a clave, en gardar ese puntiño, porque sabía que tiña distancia con Saúl e Busto”, sinala Parada, que conseguiu alcanzar e soltar a Del Cueto para presentarse na liña de meta en solitario. Cun tempo de 3:23:32, e desfrutando dunha vantaxe de 2:26, o ribeirense adxudicouse a Viveiro Bike Xtreme.

 “Estou sorprendido porque o maratón non é a miña especialidade e ser campión galego absoluto era algo impensable hai dous meses”, admitiu o corredor do Xesteiras. No podio máster-30 estivo escoltado por Daniel García (Muros), sétimo na táboa xeral, e Manuel Casuso (Xesteiras), undécimo na clasificación absoluta.

Título elite

Del Cueto conseguiu manter a segunda praza, pero non se puido relaxar ata o final porque a só 6” do asturiano rematou Sául López. O monfortino obtivo o título elite e o terceiro posto absoluto despois de pasar por Penedo do Galo, no punto de control situado a 10 km da meta, na compaña de Busto, a quen acabou batendo por 44”. O podio elite completouno Estefan González (Retelec-Alca), que pechou o top-5 xeral da proba.

A sexta praza na meta correspondeu ao novo campión autonómico máster-40 Diego Álvarez (MTC Team). Coas outras dúas medallas nesta categoría fixéronse Alejandro Trasbach e Iván Pereira, oitavo e décimo respectivamente. Entre estes dous corredores do Xesteiras concluíu o elite Alberto Alanís (Burgas Bike).

Os outros tres campións masculinos da xornada foron o sub23 Ángel Maneiro (Vigo-Rías Baixas), o máster-50 Francico Xavier López (MTC), que revalidou título, e o máster-60 Constantino Arias (Tres Lunas).

Pulso feminino

Unha ciclista da Mariña reinou entre as mulleres. A pontenovesa Teresa Barreira impúxose con remontada incluída. A elite do Extol circulaba en Landrove a dous minutos e medio da máster-30 Eva Ortega (Biciosos Rías Baixas), unha situación de carreira que mudou na segunda parte do percorrido.

Barreira detivo o seu cronómetro na meta de Viveiro tras 4:26:26 de esforzo, vencendo con 36” de colchón sobre Ortega. Ana María González (Mitto-X Sauce), defendendo con éxito a coroa máster-40, ocupou o terceiro posto na clasificación feminina. Outras tres corredoras subiron ao podio: Rebeca Muñoz (Ribadumia), cuarta na táboa absoluta e segunda máster-40; e as elites Mar Delgado (Monteneme) e Desiree Fernández (RSBike), quinta e sexta respectivamente.

A entrega de premios contou coa presenza de Jesús Fernández, tenente alcalde de Viveiro; César Docal, concelleiro de Deportes; Emilio Villarmeá, concelleiro de Cultura; José Pernas, presidente da Peña Ciclista Lar; e de Begoña Carpinteiro, secretaria da Federación Ciclismo Galega. Esta cerimonia puxo o punto final á temporada autonómica 2021 de XCM.

Clasificacións