A Copa de España de Enduro conclúe este domingo coa Montefaro Enduro Race

O calendario 2025 da Copa de España de Enduro vivirá a súa quinta e última proba puntuable este próximo domingo 25 de maio coa celebración da Montefaro Enduro Race, que terá lugar nos municipios coruñeses de Ares e Mugardos.

A Montefaro Enduro Race, que contará coa organización de Club Ciclista Pulpeiros Mugardos, gozará de preto de 200 participantes que terán que enfrontarse a un percorrido que ofrecerá vistas espectaculares e paraxes inesquecibles co mar de fondo. A proba contará con cinco tramos cronometrados, que sumados aos sectores de enlace darán como resultado un percorrido de 36,3 km con algo máis de 1.100 metros de desnivel.

A esta cita final da Copa de España de Enduro chegan como líderes da xeral o naronés Marco Veiga e a aragonesa Marta Jordán, que teñen moi encarrilada a vitoria nesta clasificación final, aínda que para certificala terán que obter un bo resultado na cita coruñesa. Veiga, vixente campión de España, terá como principais adversarios ao triunfo en Montefaro a Juan Gabriel Torralba, Ot Barrera, Bruno Jiménez e Borja Pérez; mentres que entre as grandes favoritas á vitoria no scratch feminino preséntanse, ademais de Marta Jordán, a campioa de España Cristina Menéndez, Natalia Menéndez, Celia Lanaspa ou Haizea Prieto.

Máis información