O Campionato de Galicia de Pump Track alcanza a súa terceira edición no Pereiro de Aguiar

O Pump Track incorporouse no ano 2023 á nómina de especialidades que contan cun Campionato de Galicia e a terceira edición da súa gran cita autonómica chega este domingo. Por primeira vez a provincia de Ourense será a sede deste evento no que se poñen en xogo as camisolas da Federación Ciclismo Galego. Baixo a organización do Club Ciclista Maese Riders Teams, as mellores e os mellores pilotos da nosa comunidade mediranse no Complexo Deportivo de Monterrei, no concello do Pereiro de Aguiar.

A cifra de participantes sitúase en 124, abranguendo dende a categoría Promesa á Máster-60, aínda que non haberá títulos en disputa de Infantil para abaixo. Os adestramentos activaranse ás 10:00 horas e a primeira quenda cronometrada arrancará ás 12:00 horas. Unha vez que remate, realizarase a segunda e definitiva rolda. A pista do Pereiro de Aguiar é coñecida por boa parte do pelotón rider porque a pasada campaña tivo lugar neste mesmo escenario unha xornada puntuable da a Copa Galicia de Pump Track.

Os detalles desta competición desveláronse nun acto de presentación ao que asistiron Manuel Pérez, xefe do servizo provincial de Deportes da Xunta de Galicia na provincia de Ourense; Jorge Pumar, deputado provincial da Deputación de Ourense; Rosa López e Antonio Piñeiro, por parte do Maese Riders Team; e Óscar Sánchez, vicepresidente da Federación Ciclismo Galego.

O Pump Track autonómico rematou as súas vacacións de verán a pasada fin de semana co regreso da Copa Galicia en Mugardos. Precisamente nesa localidade coruñesa celebrouse unha das anteriores edicións do Campionato desta especialidade, a do ano pasado. A estrea viviuse no 2023 no municipio pontevedrés de Mondariz.

A nómina vixente ata este domingo de campioas e campións autonómicos compóñena  compóñena Jimena Novo e Gabriel Pérez en Infantil, Leo Álvarez nos cadetes, Raúl Romero nos júniores, Sergio Veiga nos sub-23, Javier Novo nos elites, Alba Fernández na categoría absoluta feminina, Carlos Díaz nos máster-30, Francisco Lorenzo nos máster-40 e Ernesto Martínez nos máster-50.