Presentada a Copa de España Féminas 'Comarca Brigantina'

Nun acto coa presenza de autoridades e patrocinadores, desveláronse todos os detalles e apoios da Volta á Comarca Brigantina, proba organizada polo Club Ciclista Betanzos co impulso do Concello de Betanzos e a Xunta de Galicia.

Ao acto asistiron María Barral, alcaldesa de Betanzos; Roberto Martínez, xefe de servizo de deportes da Xunta de Galicia na provincia da Coruña; Juan Carlos Muñiz, presidente da Federación Ciclismo Galego; Ricardo Cheda, concelleiro de deportes de Betanzos; Patricia Vázquez, concelleira de deportes do Concello de Bergondo; Lucía Santos, representante de Gadis Supermercados; Alberto Ballester, presidente do Club Ciclista Betanzos; Andrea Prado, ciclista do Farto formada no CCB; e Jorge García, do CTA Galego.

O evento serviu para que o presidente do Club Ciclista Betanzos, Alberto Ballester, puxese en valor e agradecese o apoio de institucións e patrocinadores ao club para sacar adiante esta proba. "Imos un paso máis aló despois de tantos anos de apoio ao ciclismo base coa organización dunha proba de Copa de España Féminas que vai traer centos de corredoras de todas as idades a competir".

Tomou a palabra Ricardo Cheda, concelleiro de deportes de Betanzos, que quixo agradecer "o labor do Club Ciclista Betanzos. Este Concello está orgulloso de ter un ente deportivo tan implicado e pola nosa banda van contar co apoio necesario para todas as iniciativas que se poñan en marcha".

Na súa intervención, o presidente da Federación Ciclismo Galego, Juan Carlos Muñiz, encomiou "a traxectoria do Club Ciclista Betanzos, coa organización de probas coa Comarca Brigantina en categoría elite e sub-23 masculina e agora cunha proba da Copa de España". Referiuse tamén á figura de José Ventosa, impulsor do ciclismo feminino. "Grazas ao seu traballo, xurdiron corredoras que marcaron un antes e un despois: Patricia e Silvia Roel, Janeth Barreiro, Yenifer Couceiro levaron o nome de Betanzos a nivel internacional. O labor de Ventosa para a formación de corredoras foi realmente positivo".

Roberto Martínez, responsable de deportes da Xunta de Galicia na provincia da Coruña, puxo en valor a "colaboración entre institucións que se realizou. Non só nesta proba, que conta co impulso da Xunta. Estamos a traballar especialmente para o fomento e promoción do ciclismo feminino en centros escolares co Club Ciclista Betanzos con resultados moi positivos".

A alcaldesa María Barral quixo destacar "a unión de turismo e deporte que nos permite esta proba da Copa de España Féminas. É moi bonito que veñan a Betanzos tantas corredoras para a competición, pero tamén para descubrir a cidade xunto ás súas familias. Visibilizamos á muller nunha proba de primeiro nivel e potenciamos a imaxe de Betanzos".

Ás 9 horas poñerase en marcha a proba cadete, con 30,7 quilómetros a través de Betanzos, Bergondo e Paderne con dúas voltas ao circuíto e un desnivel acumulado de 340 metros. Posteriormente, as junior e máster disputarán 46,8 quilómetros con tres voltas ao mesmo circuíto e 520 metros de desnivel acumulado.

A proba raíña iniciarase ás 12:30 horas con 73 quilómetros que inclúen tres voltas ao circuíto engadidas a outra volta de 25 quilómetros que engade a ascensión a 'O Galibier', unha subida de 3,7 quilómetros ao 5,3% e acumula 930 de desnivel positivo para a manga final.

Patrocinan e colaboran coa organización da Copa de España Comarca Brigantina o Concello de Betanzos, GADIS, Xunta de Galicia, Deporte Galego, Becani Soluciones Industriales, Pulidos Prado, Ineltrón, Grelo, Canlemar, Oxidine, Bropemor, Olipes, Betanzos Autocenter, Metal Work, Porto de Paula, Visami, Vilar do Colo, Talleres González, Automoción Fene e los vehículos oficiais Hyundai / Finisterre Motor.

Fonte: El Pelotón