Dobre cita galega para dar continuidade á Copa de España Féminas Cofidis

Esta fin de semana do 29 e 30 de marzo, a Copa de España Féminas Cofidis trasládase a Galicia para vivir unha apaixonante dobre cita nas localidades de Betanzos e Pontevedra, sendo a terceira e cuarta proba do certame estatal, que vai chegar ao ecuador da competición.

O municipio coruñés regresa á competición estatal coa celebración da Copa de España Féminas – Comarca Brigantina baixo a organización do Club Ciclista Betanzos, que propuxo un circuíto circular dun 16 km por volta ao redor da ría. As cadetes darán dúas voltas, as júnior e máster, tres, mentres que as mozas da categoría elite/sub23 tamén virarán en catro ocasións, incluíndo na última volta a subida ao alto do Galivier, de 3,5 km ao 5,5%, que pode ditar sentenza na proba que percorrerá 73 quilómetros totais. A saída realizarase desde a praza García Irmáns de Betanzos, mentres a chegada será na praza da Constitución en pleno corazón histórico do Castro de Untia. En canto aos horarios, ás 9:00 horas comezarán as cadetes, ás 10:30 horas farano as júnior e máster e pecharán a competición as elite/sub23 ás 12:30 horas.

Pola súa banda, ao día seguinte, o Gran Premio Cidade de Pontevedra, baixo a organización de Noko 360 Sports Consulting, celebrará o seu quinto ano consecutivo dentro da Copa de España Féminas Cofidis. As cadetes abrirán a competición ás 9:00 horas, cun percorrido de 44,2 km a beiras da ría e co Alto da Porteliña de 1,3 km e 6,4% de pendente media, como principal protagonista. Pola súa banda, as júnior e máster, farano ás 10:30 horas, cun percorrido 65,4 km e unha ascensión á Porteliña. Xa por último, as elite/sub23 comezarán a súa carreira ás 12:45 horas para percorrer 99 quilómetros e dúas ascensións á Porteliña, a última delas a 10 quilómetros da liña de meta.

A terras galegas chega Eukene Larrarte como líder absoluta, cunha diferenza de 17 puntos sobre as ciclistas da UPV Valeria Valgonen e Diana Smirnova. A ciclista do Massi Baix Ter tratará de defender o seu liderado, apoiándose na súa compañeira Susana Pérez, vixente gañadora da Copa e que xa sabe o que é vencer en Pontevedra. En Galicia, tamén estará o potente bloque da UPV coas rápidas corredoras rusas mencionadas anteriormente; o Cantabria Deporte – Río Miera, con Eva Anguela, cuarta clasificada, á cabeza; o equipo galego Farto – Kiroot, con nomes destacados como Isabella Bertold ou Agua Marina Espínola ou o sempre combativo equipo do Canyon, coa gañadora en Beasain Joelle Ameilie Messemer ou Emily Dixon.

Como líder junior, Irati Aranguren defende o seu liderado ante a santiaguesa Alejandra Neira; Maixa Odriozola farao nas cadetes; Tamara Álvarez nas máster-30, Úrsula Ospina nas máster-40 e María del Carmen Melgar nas máster-50. 

Fonte: RFEC