A Xaxanbike vibrou coa explosividade do Campionato de Galicia Eliminator

Un percorrido de pouco máis de 700 metros que son pura adrenalina exerceu por segundo ano consecutivo de escenario do Campionato de Galicia de Cross Country Eliminator (XCE). A Xaxanbike 2022 despediuse este domingo de xeito explosivo cunha especialidade á que lle ten tomada a medida Jorge Punzón. O porriñés do Cosmos revalidou en Marín o título absoluto masculino e recibiu a coroa autonómica xunto á anfitrioa Irene Trabazo. 

A terceira edición deste Campionato, que se estreou no 2017, contou coa chuvia como factor engadido nun circuíto xa de por si catalogado como de dificultade alta. O evento organizado polo club XSM seguiu o formato habitual das probas de Eliminator. Comezou unha contra o reloxo individual que serviu para organizar os cadros antes da disputa das eliminatorias, carreiras con catro participantes nas que se poñen en xogo dous billetes para a seguinte rolda. 

Alberto Pedreira (Bici Verde) marcou un tempo na crono de 1'56", mellor rexistro igualado a segundos co de Punzón. Deste xeito, os dous elites porriñeses non se cruzarían ata a gran final no caso de ir superando quendas. A rolda de cuartos tivo como nova máis negativa a caída de Álvaro Rey, un percance que se saldou cunha fractura de clavícula do corredor elite do Cambre Caeiro. 

Pedreira e Punzón alcanzaron a final cada un por un lado diferente do cadro e xunto a eles compartiron grella de saída na carreira polas medallas dous representantes do Coruxo: o sub23 Anxo Carril e o júnior Danny Buba. Este duelo a catro quedou marcado polo acontecido na primeira curva. Os dous elites chegaron igualados e o do Bici Verde foise ao chan.

Tras o accidentado inicio, o defensor do título tivo vía libre para repetir éxito en Marín. Punzón, medallista nesta especialidade a nivel estatal, adxudicouse a vitoria por diante de Carril e co terceiro posto do podio fíxose Buba. 

A camisola deste Campionato de Galicia que si cambiou de mans foi a absoluta feminina. A marinense Irene Trabazo, única elite, compartiu final co tándem cadete do Rosal formado por Arantxa Gómez, que se impuxo dentro da súa categoría, e Irene Rodríguez, e coas infantís Lara Pita, primeira no seu grupo de idade, e Xiana Coira, ambas do Cambre 

Cadetes e Infantís

As competicións Cadete e Infantil masculinas celebráronse ao marxe do Campionato. Na primeira venceu Mauro Vega (Coruxo), con Martín Díaz (Caimanes) na segunda praza, Antonio Casal (Cambre) na terceira e Raúl Puelles (Caimanes) clasificándose cuarto. En canto aos infantís, o máis rápido foi Xian Alvariño (Ponteareas) batendo a Lucas Lozano (Farto), mentres que terceiro rematou Diego Valladar (Coruxo) e cuarto, Carlos López (Ribadumia).

Antonio Traba, concelleiro de Deportes de Marín, asistiu á cerimonia de podio na que se entregaron os premios e as camisolas autonómicas. O seguinte Campionato de Galicia de Cross Country chegará o vindeiro domingo en Maceda e será o da especialidade olímpica (XCO).

Clasificacións