A Copa Galicia XCO ofrece tres intensos meses de calendario

A primavera e o inicio do verán presentan un calendario do máis esixente para os especialistas autonómicos no Cross Country Olímpico. En pouco máis de tres meses celebraranse as nove probas que compoñen a Copa Galicia XCO 2022. Un certame que combina citas clásicas do panorama autonómico con outras que se van consolidando e cunha estrea. 

O mes de abril será o máis intenso con catro eventos. A Copa arrancará o domingo 3 de abril coa novena edición do Trofeo BTT Rallie Cidade de Ferrol, continuará na provincia da Coruña co V XCO Caimanes en Betanzos o domingo 9 de abril e na segunda quincena trasladarase ao sur da provincia de Pontevedra: o II Trofeo XCO Concello do Porriño está fixado para o domingo 17 e o IV Trofeo BTT-XCO Grupeta Pan de Zarko terá como escenario A Cañiza o sábado 23. 

Tras dúas fins de semana de paréntese, a Copa regresará o sábado 14 de maio cun debut no calendario autonómico. O Team Bike Outeiro de Rei organiza o primeiro XCO Penas de Rodas. Dunha estrea na provincia de Lugo pasarase á proba decana do Cross Country Olímpico galego coa disputa o sábado 28 de maio en terras coruñesas do XXI Gran Premio Concello de Cambre de BTT. 

Antes de que conclúa a primavera entrarase na recta final da Copa con dous sábados de competición en xuño. O día 11 será a quenda do IV XCO Concello de Oroso e unha semana máis tarde, do Xaxanbike 22 en Marín. A clausura do certame autonómico chegará o sábado 9 de xullo, ao igual que aconteceu o pasado ano, realizarase en Ribadumia co II XCO Kiwi Atlántico.

CALENDARIO

3/04 Trofeo BTT Rallie Cidade de Ferrol - Ferrol C.C.

09/04 XCO Caimanes - Caimanes Betanzos, C. BTT

17/04 Trofeo XCO Concello do Porriño - Avanza, A.D. 

23/04 Trofeo BTT-XCO Grupeta Pan de Zarko - Grupeta Pan de Zarko C.

14/05 XCO Penas de Rodas - Team Bike Outeiro de Rei C. 

28/05 Gran Premio Concello de Cambre de BTT - Cambre C.C. 

11/06 XCO Concello de Oroso - Tambre Bike C.C. 

18/06 Xaxanbike 22 - XSM, C.C.

9/07 XCO Kiwi Atlántico - Ribadumia C.C.