Facebook Twitter Youtube Instagram Español

Galicia acada o subcampionato de España no Team Relay de Vic

13 DE ENERO DE 2023

Catalunya venceu por diante do sexteto formado por Samuel González, Andrés Calvete, Xián Alvariño, Irene Trabazo, André Martínez e Miguel Rodríguez. A Comunidade Valenciana completou o podio

Galicia-acada-o-subcampionato-de-Espana-no-Team-Relay-de-Vic

Os anfitrións impediron este venres que Galicia revalidara a súa coroa na proba Team Relay coa que se puxo en marcha o Campionato de España de Ciclocrós 2023 no circuíto barcelonés de Vic. Catalunya fíxose co título na carreira de remudas por combinados autonómicos e o sexteto formado por Andrés Calvete, Xián Alvariño, Samuel González, Irene Trabazo, André Martínez e Miguel Rodríguez obtivo a segunda posición. O conxunto da Selección de Breogán liderou ata a penúltima volta antes de resistir ante a Comunidade Valenciana na pugna final pola medalla de prata.

O arranque do Team Relay ratificou a candidatura do equipo da Federación Ciclismo Galego a acadar a súa terceira vitoria consecutiva nunha competición que non se celebrou nin no 2020 nin no 2021. O seleccionador Alberto del Río decantouse polo elite Samuel González como primeiro remudista e o corredor vigués rematou o seu xiro á par do sub23 Diego Ruiz de Arcaute da selección de Euskadi. A igualdade á fronte da proba rachouna o máster-40 Andrés Calvete a prol de Galicia e o primeiro posto momentáneo acadado polo especialista de Cambre conservouno no terceiro xiro ao circuíto o júnior ponteareán Xián Alvariño.

Ao ecuador da carreira chegouse coa Selección de Breogán cunha vantaxe de 3 segundos respecto a Asturias. Os dous conxuntos tiñan como remudistas ás súas elites e nunha espectacular actuación a marinense Irene Trabazo despegouse da vixente campioa estatal Lucía González e ampliou a renda galega sobre o combinado do Principado ata os 19”, mentres que entre as dúas corredoras situouse o júnior catalán Carlos Gámez.

A diferenza no inicio da penúltima volta era de 5” favorable a Galicia, que cedeu o primeiro tras o adiantamento do sub23 Nil Solà ao júnior André Martínez. Malia medirse a un ciclista dunha categoría superior, o xuvenil porriñés non perdeu a roda do representante local. A emoción disparouse na última remuda. Catalunya ía 1” por diante da defensora do título e avantaxaba en 5” á Comunidade Valenciana. O sub23 ponteareán Miguel Rodríguez conseguiu afastarse do elite valenciano Adrián Aranda, a quen bateu por unha decena de segundos, pero non puido coa explosividade do elite Jofre Cullell, olímpico en Tokyo 2020 na modalidade de XCO, e a selección catalá gañou cunha marxe de 9”.

Cadetes e masters

Despois de subir o pano co Team Relay, o Campionato de España de Ciclocrós céntrase dende este sábado nas probas individuais. A sesión matinal está reservada para as categorías masters masculinas, con Andrés Calvete lucindo de novo as cores do combinado autonómico ás 10:45 horas nos máster-40.

Pola tarde chegará a quenda das carreiras cadetes, a categoría que compón case ao 50% a convocatoria de Galicia. Ás 15:00 h. poranse en marcha as rapazas cadetes con Lorena Patiño, Alba Gregores, Iris Fernández e Alejandra Neira. Xunto a elas competirán as masters, con Marina González formando parte da Selección de Breogán e buscando revalidar a coroa máster-40 lograda o ano pasado.

A continuación, ás 15:50 h., comparecerán os rapaces cadetes con sete representantes de Galicia: Darío Buceta, Néstor Frías, Santiago Otero, Arón Lorenzo, Xián Alvariño, Raúl Puelles e Adrián García.

Máis información 

GALERÍA DE FOTOS

Galicia acada o subcampionato de España no Team Relay de Vic
Galicia acada o subcampionato de España no Team Relay de Vic
Galicia acada o subcampionato de España no Team Relay de Vic
Galicia acada o subcampionato de España no Team Relay de Vic
Galicia acada o subcampionato de España no Team Relay de Vic
Galicia acada o subcampionato de España no Team Relay de Vic
Galicia acada o subcampionato de España no Team Relay de Vic
Galicia acada o subcampionato de España no Team Relay de Vic
Galicia acada o subcampionato de España no Team Relay de Vic
 

R/ Fotógrafo Luís Ksado, 17
36209 Vigo (Pontevedra)
Tel.: 986.22.41.58
federacion@fgalegaciclismo.es