Damián Ramos finaliza décimo na proba en liña C4-C5 dos Xogos Paralímpicos

Damián Ramos pechou a súa primeira participación nos Xogos Paralímpicos cunha boa actuación na proba en liña C4-C5 que lle levou a cruzar a meta na décima posición e que lle permite extraer, en liñas xerais, un balance moi positivo do seu debut. O representante do ciclismo galego en París márchase da capital francesa cunha medalla de bronce na contra o reloxo C4, cun diploma olímpico froito de ser oitavo na Persecución Individual e cun bo desempeño na carreira deste venres na que foi o terceiro corredor en concluír da clase 4 de bicicleta adaptada.

Ás 9:30 horas deu comezo a proba en liña C4-C5 no circuíto de Clichy-Sous-Bois, que se atopaba completamente seco a pesar das intensas choivas caídas onte. Desde os primeiros compases, as seleccións de Países Baixos e Francia tornáronse como as máis activas e atoparon ambas o premio de situar a un dos seus corredores na cabeza. Martin Van de Pol e Gatien Le Rousseau completaron á fronte a primeira das sete voltas que comprendía a carreira, mentres que no grupo perseguidor, que cruzou o arco de meta a uns 15 segundos, atopábase Damián Ramos.

Esta formación na que rodaba o coruñés rompeuse á súa vez en varios grupos e o paraciclista do Lasal Cocinas - Craega quedou no terceiro deles. Desde entón, iniciou unha carreira de menos a máis que lle foi permitindo recuperar posicións. Por diante, o francés Kevin le Cunff e o ucraíno Yehor Dementyev deron caza aos dous ciclistas de cabeza para formar un cuarteto que a pesar de vivir múltiples ataques non chegou a romper. Le Cunff, Le Rousseau, Van de Pol e Dementyev xogáronse na mesma recta de meta ao esprint as tres medallas que contemplaba esta proba en liña C4-C5.

O ouro levouno o ucraíno despois de superar pegado ao valado a Le Cunff, que se tivo que conformar coa prata, mentres que o bronce acadouno Van de Pol. Ramos, pola súa banda, seguiu realizando o seu traballo e aos poucos foi cazando unidades que pagaron o exceso de tratar de seguir o ritmo do grupo de cabeza. Finalmente, chegou a capturar ao grupo inmediatamente perseguidor dos catro primeiros clasificados e xunto a eles afrontou o último tramo da carreira. Xa nos derradeiros compases da proba, o galego da selección española perdeu contacto co grupo que permitía loitar polo quinto posto e tivo que conformarse coa décima praza, sendo o terceiro mellor ciclista da clase C4. Unha boa actuación coa que redondeou unha participación máis que notable nos seus primeiros Xogos Paralímpicos. 

Clasificación